InterCity

Quest articol chì l'è scrivuu in lombard, grafia milanesa.

Tipich logo InterCity, in version austriega

InterCity a l'è 'na categoria de servizzi di treni a longa percorrenza che la se fèrma domà in di comun pussee important. Ona varianta a l'è l'EuroCity che 'l conliga di città europee.

Per Stat

Belgi

In Belgi i InterCity connetten i città pussee important del Stat ma di voeult fann anca servizzi quasi local cont di fermaa in di stazion minor.

Cechia

In Cechia i treni InterCity servissen i tratt:

• Bohumín-Břeclav
• Bohumín-Praga
• Třinec-Praga
• Cheb-Praga (SuperCity cont el Pendolino)
• Havířov-Praga

La pupart di servizzi a hinn faa de la compagnia del Stat České dráhy e di compagnij privaa RegioJet e LEO Express.

Irlanda

In Irlanda i InterCity conlighen Dublin a la pupart di città important de l'Irlanda e anca a l'Irlanda del Nord.

Italia

Per savenn pussee, varda l'articol InterCity (Italia).

In Italia l'InterCity a l'è 'na red capillara che la conliga la pupart di città del Stat, cont pussee de 80 connession diurn e notturn. I lign pussee important a hinn Turin-Lecce (domà de nocc), Milan-Bari, Bolzano/Bozen-Bari, Venezia-Bari, Milan-Roma e Trieste-Napoli. Al Sud i connession a hinn Roma-Palermo, Roma-Bari, Roma-Naples e Roma-Reggio di Calabria. In del Nord, i InterCity connetten Turin-Genoa, Milan-Genoa, Milan-Livorno e Venezia-Fiorenza.

I treni a hinn di composizion ordinari faa di carrozz de prima e segonda class, cont i cuccett per i treni nogg.

Polònia

In Polònia l'azienda PKP Intercity la gestiss i conligament InterCity, principalment cont i locomotiv EuroSprinter ma di voeult cont i locomotiv EP08 e EP09.

Svizzera

In Isvizzera i InterCity a hinn nassuu in del 1982 per sostituì i Swiss Express e hinn al midemm prezzi kilometrich di regionai. A hinn faa cont trè composizion:

• Faa su de 8 a 12 carrozz e de 'na locomotiva FFS Re 460
• Carrozz a du pian IC 2000 semper trainaa di Re 460
• Elettrotreno FFS RABDe 500 ad assett variabil

Regn Unii

I British Rail han mittuu la categoria in del 1966 cont la carrozza British Rail Mark 2, pussee confortevola in sui longh distanz. Incoeu, cont i ferrovij privatizzaa, i servizzi a hinn faa de Abellio Greater Anglia, CrossCountry, Great Western Railway, Virgin Trains, Virgin Trains East Coast, East Midlands Trains, Hull Trains e Grand Central e gestii cont di composizion varij.

Vos corelaa

• EuroCity
• InterRegio