Incident de l'AS 7007
|
Quest articol chì l'è scrivud in lombard, con la Noeuva Ortografia Lombarda |
L'incident de l'AS 7007, cognossud anca 'me el dì che 'l s'è s'cepad l'Internet, a l'è stad un esempi de BGP hijacking involontari capitad el 25 de avril 1997 quand che un router del sistema autonom 7007, cioè MAI Network Services ma despess ciamad per eror a Florida Internet Exchange, l'ha relassad a causa de 'n problema la pupart de la soa tabella de routing ai so vesin e l'ha cread donca un bus negher, cont i router che hann tacad a pensà che la pupart de l'Internet la gh'havess de passà per quell sistema autonom e che donca hann mandad in del ruf la pupart del trafegh. Tra l'alter, se pensa per un bug, a eren stad nonziad cont una class CIDR assee specifega, cioè "/24", cont el Border Gateway Protocol che 'l favoriss la specificità.
A causa anca de 'na tabella de routing che l'era deventada pussee granda de 'n orden de grandezza del solet, in di orden di 450'000 unità, la pupart di router di confin inn crashad e quand che se pizzaven ancamò e imprendeven de 'n vesin la tabella crashaven ancamò, inscì de provocà ore de rallentament e problema in su la Red. Quei che inn restad in pè, inveci, sutaven a mandà el so trafegh a travers de l'AS 7007, che l'era stad smorzad per provà a fermà el problema, ma l'AS 1790, arent a lu, l'ha sutad a mandà inanz la tabella fallada cont i so dacc senza considerà el facc che 'l fuss smorzad.
L'incident, retegnud vun di pussee gram in tuta la storia de l'Internet, l'ha menad i ministrador de sistema a capì i ris'c del protocoll BGP e a mitigài, per esempi cont el meter un limit ai nonzi che 'l po fà un router de confin in d'un dad temp prima de vesser blocad.