Giorgio Gaber

Quest articol chì l'è scrivuu in lombard, grafia milanesa.

El Giorgio Gaberscik, mej cognossuu cont el nomm de Giorgio Gaber (Milan, 25 de genar 1939 - Camaiore, primm de genar 2003) l'è staa on cantant e autor de teater italian.
A l'è staa vun di cantautor pussee important e cognossuu de la canzon italiana.

Biografia e overa in general

L'è nassuu a Milan de ona fameja triestina (el sò cognomm el vegna del Gorizian e l'è de origin islovena). Quand che l'era piscinin, el gh'ha scominciaa a sonà la ghitarra per curà di problema al brasc sinister (poliomelite). A la fin di Agn Cinquanta el cognoss l'Enzo Jannacci (che 'l restarà on sò amis fina a la fin) e l'Adriano Celentano, coi quai el fa sù i Rock Boys, vuna di primm rock band italiann.
Fina a la fin di Agn Sessanta el vegna vun di protagonista pussee important de la canzon lingera italiana, e l'ha tolt part a on mucc de trasmission televisiv. In del 1965 el sposa l'Ombretta Colli (che la diventarà anca presidenta de la Provincia de Milan in del 1999). De 'sto period, a vann regordaa i colaborazion con Jannacci e con Mina.

A partì del 1970 la soa carriera la gh'ha on cambiament: Gaber, forsi stufii del roeul che 'l gh'era in television, el scerniss de dedicàss soratutt ai esibizion in teater. In del 1972 la scomincia la colaborazion cont el parolier Sandro Luporini, che la narà inanz per on bell poo de agn. Di sò spetacoi vegnen registraa di album. I sò ategiament anticonformistegh el slontanen demaneman anca del sò tradizional publegh de sinistra, e inscì el vegn vun di simboi del pensee liber.
Oltra a esibìss, el scriv anca spetacoi teatrai per alter (per esempi, per la soa miee).
Anca se intrattant el s'è malaa de cancher, el suta a fà su di disch e spetacoi. El moeur in del 2003 in de la soa cà in Versilia.

Canzon famos

Vos corelaa