Giagum Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Giagum

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹De due vegnen i guèrr e i racul intra vialter? No de scià, di voster passiún che cumbaten in di voster member? ²Vurii, e gh'avii no; mazii e gh'avii invidia, e pudii minga utegnì; raculii e fii la guèra. Gh'avii no perchè vialter avii minga dumandaa. ³Dumandii e ricevii no, perchè dumandii mal, per spend per i voster passiún. ⁴Adülter, savii no che la messizia cunt el mund l'è inemessizia de Diu? Dunca, chissessìa 'l vör vèss un amis cunt el mund s'è miss un nemis de Diu. ⁵O pensii che vujamént la Scritüra la dis: Lü el vör a l'invidia el Spirit che 'l sta de cà in nümm? ⁶Ma dann a nümm una grazia püssee granda: già che la dis: Diu el s'uponn ai arugant, ma ai ümil el da grazia. ⁷Dunca, sutametees a Diu; e resistee 'l diàul, e 'l scaparà de vialter; ⁸fees vesin a Diu, e 'l se farà vesin a vialter. Netee i voster man, pecadúr, e pürifeghee i voster cör, quij de anema dupia. ⁹Afligees e piangee e caragnee: che 'l voster rid el müd a piangiüda e la letizia a tristeza. ¹⁰Fees ümil denanz al Signur, e 'l ve levarà in alt. ¹¹Dii no mal vün de l'alter, fradèj; chi 'l dis mal d'un fradèll o el giüdega el so fradèll el dis mal de la lég e 'l giüdega la lég; e se te giüdeghet la lég, te see minga vün che 'l fa la lég, ma un giüdes. ¹²Gh'è vün Legisladúr e Giüdes, che 'l po salvà e destrüg: ma chi te seet, tì che te giüdeghet el to prossim? ¹³Scultii adèss, quij che dii: Incöö o duman andarèmm a tal zità, e passarèmm là un ann, e farèmm un negozi e guadagnèmm; ¹⁴ma nigün de vialter el sa cume sarà la vostra vita duman! Già che sii un vapur che 'l cumpar per un pocch temp e pö el spar. ¹⁵Inscambi, duvarìuv dì: Se 'l Signúr el vör, vivarèmm e farèmm chèsta cossa o chèla cossa. ¹⁶Ma adèss vantii in de la vostra aruganza; ogni tal vant l'è malign. ¹⁷Dunca, chi 'l sa fà el bén e 'l ghe fa no, l'è un pecaa per lü.

Navigaziun