Giagum Capitel Düü

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Giagum[Modifega | modifica 'l sorgent]

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü[Modifega | modifica 'l sorgent]

1Mè fradèj, cun distinziún di personn gh'avii minga la féd del noster Signur gluriús Gesü Crist. 2Già che se un omm cunt un anèl d'or in de vest magnifegh el ven denter in de la vostra sinagoga, e anca 'l ven denter un por in de vest slisaa, 3e vialter dee atenziún speziala[1] al qual chi 'l porta i vest magnifegh e disii: «Sètes giò chilò bén», e al por disii: «Stee là in pee, o sètes gio suta 'l mè scagn», 4avii minga faa distinziún intra vialter medem, e sii devegnüü giüdes de pensee malign?
5Scultee vialter, mè fradèj predilètt. L'ha minga cataa föra Diu i por del mund insci de vèss sciúr in de la féd e i eréd del règn che l'ha prumetüü a quij che 'l vören bén? 6Ma vialter avii desunuraa i por. Vi uprimen no i sciúr, e vi tiren a i tribünaj? 7Bestemen minga lur el bun nomm che l'è staa invucaa sura vialter? 8Però, se vialter cumpii la lég legala segund la Scritüra: «Te vuraree bén el to prossim cuma te medemm», fii bén; 9Ma se fii distinziún di personn, cumetii un pecaa, e sii cunvinciüü de la lég cuma trasgressúr. 10Già che chissessìa 'l usserv la lég intrega, ma 'l ufenda in d'un punt, el devén culpevul de tücc. 11Già che chèll che l'ha dii: «Fà tì minga adültéri», anca l'ha dii: «Maza tì no». E se te fee minga adültéri, ma te mazet, tì te see devegnüü trasgressúr de la lég. 12Parlee vialter inscì e fee inscì cuma quij che hinn dree a vèss giüdegaa segund la lég de la libertaa. 13Già che el giüdizi sarà senza misericordia per chi l'ha faa minga la misericordia; la misericordia la triunfa sura 'l giüdizi!
14Che ütil l'è, mè fradèj, se quajdün el dis che l'abia la féd, ma 'l gh'ha minga i oper? La féd la po minga salvàll. 15Se un fradèll o una surèla hinn biòtt e manchen el mangià de ogni dì, 16e vün de vialter el ghe dis: «Vee vialter in de la pas, vi scaldii e vi sagulii», ma ghe dii minga chell che gh'hann besogn al so corp, che ütil l'è? 17In de l'istessa manera, la féd, se gh'ha minga i oper, l'è morta de se medema. 18Ma quajdün el dis, «Tì te gh'hee la féd, e mì a gh'huu i oper, famm tì vedè la tua féd senza i oper, e te fuu vedè la mia féd cun i mè oper. 19Tì te credi che gh'è vün Diu? Te fee bén--anca i demoni creden e tremen! 20Ma te vöret savè, o ümán vöj, che la féd senza i oper l'è inütila? 21Abràm, noster pader, l'è staa giüstifegaa minga travèrs i oper, quand l'ha ufèrt Isàc, el so bagaj, sü l'altàr? 22Te vedet che la féd l'opera insèma cun i so oper, e travèrs i oper la féd l'è faa perfèta, 23e la scritüra l'è stada cumpida, che la dis: «E Abràm l'ha credüü a Diu, e 'l gh'ha cüntaa per giüstizia», e l'è staa ciamaa un amís de Diu. 24Vialter vedii che travèrs i oper una persona l'è giüstifegada, e minga dumà travèrs la féd. 25E in de l'istessa manera, anca Raab, la pütàna, l'è stada giüstifegada minga travèrs i oper, quand l'ha ricevüü i mèss e la j'ha mandaa föra per un'altra via? 26Già che cuma 'l corp senza 'l spirit l'è mort, inscì anca la féd senza i oper l'è mort.

  1. o vardee

Navigaziun[Modifega | modifica 'l sorgent]