Gesa de la Passion
La Gesa de la Passion (italian: Chiesa di Santa Maria della Passione) a l'è ona gesa catolega de Milan, la segonda pussee granda de la citaa dopo del Domm.
La se troeuva in del center storegh, arent al Conservatori e minga tropp delong del Tribunal e del Cors de Porta Vitoria. A l'è vun di esempi pussee bei del manierism milanes. Dent in de la gesa se troeuva quader del Gaudenz Feree, del Daniell Cresp e de tanc olter artista del manierism e barocch lombard.
L'è part de la comunità pastoral di Sant Profeta, insemma a la Gesa de San Babila, a la Gesa de la Madona de la Sanità a la Gesa de San Peder in Gessaa e a la Gesa de San Franzesch de Paola
Storia[Modifega | modifica 'l sorgent]
El primm tocch a vess tiraa su (in del 1486) l'è staa quell terminal, faa su comè on otagon con dent vott capell ligaa insema a pianta meza circolar o retangolar. L'impiant primitiv a l'è staa pensaa del Gioann Antoni Amadee, ma l'è staa portaa a tecc del Gioann Battagg. La soa pianta a l'era pu o manch compagna de quella de tanc olter santuari marian de la Lombardia del Renassiment.
Pussee inanz, el Cristofen Lombard l'ha tiraa su el tiburi.
In del 1573 el Carlo Boromee l'ha ciamaa de slargà la gesa: inscì l'è stada slongada cont on impiant longitudinal, che l'era pussee adatt per la predicazzion. Gh'è staa giontaa i navad (faa del Martin Bass) e la faciada barocca, che l'è del Ses'cent.
In del Vottcent, la cort del sò convent vegg l'è stada trasformada in del Conservatori de Milan.
Alter progett[Modifega | modifica 'l sorgent]
Wikibooks el gh'ha dent test o manuai in su Gesa de la Passion
Wikimedia Commons el gh'ha dent imagin o alter archivi su Gesa de la Passion
