Friedrich Nietzsche

Quest articol chì l'è scrivud in lombard, con la Noeuva Ortografia Lombarda

El Friedrich Nietzsche

El Friedrich Wilhelm Nietzsche [ˈfʁiːdʁɪç ˈvɪlhɛlm ˈniːtsʃə] (Röcken, 15 de otober del 1844 – Weimar, 25 de agost del 1900) l'è stad on filosof, poeta, composidor e scritor todesch. El so penser l'ha influenzad la pupart del mond coltural europee in tra la fin del vot-cent e 'l principi del noeuv-cent, 'me per esempi el poeta italian D'Annunzio.

Biografia

Fioeul de un pastor protestant, el studia ai università de Bonn e de Lipsia, indova che el maester filologh Firedrich Ritschl el ghe procura in del 1869 una ciamada per la catedra de lengua e leteradura grega a l'università de Basileja, cità indova che l'insegna in fina al 1879. In quel period chì a l'è despess ospitad in de la cà del Wagner a Tribschen, in su lagh de Luserna. In del 1879 el moca de insegnà e el viv in tra la Franza e l'Italia cont una pension de l'università. Propi a Turin, in del 1889, el Nietzsche el deventa mat. El filosof l'haveva tacad a tribolà sgiamò del 1873 de mal del coo e perdida de la vista, de sorapu el gh'haveva di problema de digestion e el faseva fadiga a dormì. L'orisgen de la malatia l'è forsi stada causada de la sifilida, anca se 'l s'è pensad anca a un mal ereditari. Salud e malatia hann fad nasser un problema cont i scricc postum, defad, dop de l'atach de Turin, el Nietzsche el passa un period in cà de cura e 'l viv i so ultem agn con la sorella Elisabeth Förster. L'è lee che la gh'ha de meter orden ai ultem penser che 'l fradell l'haveva scrivud sgiò per l'ideja, poeu bandonada, de fà su un'oeuvra pussee granda: La volontà de potenza. Con quell titol chì l'Elisabeth, insema a un allev del filosof, el Peter Gast, la publega in del 1906 un lavorà impienid de nazzionalism e razzism, delonsg del ver penser del Nietzsche.

Penser

El penser del Nietzsche el se troeuva in d'un pien decadentism, arent in d'un prim period a la filosofia del Schopenhauer e al prosget wagnerian de un noeuv concet de oeuvra lirega e de musega, che 'l da la bas a la so prim grand scrit: La nassida de la tragedia del spirit de la musega. Un noeuv concet de classicità grega, con du spirit: vun dionisiegh e l'olter apollinov. El prim l'è representad de la musega e l'è la ruzada del caos del vesser, el segond el gh'ha 'me simbol la scoltura e l'è un mond de forme definide e precise. L'element dionisiegh e quell apollinov se troeuven insema in de la granda tragedia grega de l'Eschil e del Sofochel, considerada la forma d'art pussee volta, che però la moeur sgiamò con l'Euriped, a causa del Socrat, che 'l parpon una vision razzionalistega e otimistega del mond. In di oeuvre che vann del 1878 a la scritura del Inscì l'ha parlad el Zarathustra, el Nietzsche el desvilupa la so critega de la razzionalità socratega, che la domina la coltura europeja. Despoeu del 1883 la ciapa semper pussee importanza l'ideja de "eterna tornà a l'ingual", con di tema 'me "volontà de potenza", "nichilism" e "Übermensch" ("om del soravia"), che inn anca quei pussee dificil de interpretà, per via de l'ambiguità de scritura.

Oeuvre principai

• Die Geburt der Tragödie (La nassida de la tragedia), 1872
• Menschliches, Allzumenschliches (Uman, tropi uman), 1878
• Morgenröte (Aurora), 1881
• Die fröhliche Wissenschaft (La scenza giojosa), 1882
• Also sprach Zarathustra (Inscì l'ha parlad el Zarathustra), 1885
• Jenseits von Gut und Böse (De là del ben e del mal), 1886
• Zur Genealogie der Moral (La genealogia de la moral), 1887
• Götzen-Dämmerung (L’imbrunì di Dé), 1888
• Der Antichrist (L'Anticrist), 1888
• Ecce Homo, 1888

Bibliografia

• Enciclopedia Garzanti di Filosofia, Garzanti