Franzesch III Gonzaga
|
Quest articol chì l'è scrivud in lombard, con la Noeuva Ortografia Lombarda |
El Franzesch III Gonzaga (Mantova, 10 marz del 1533 – Mantova, 21 fevrer del 1550) el fudè el segond duca de Mantova e marches del Monferrad a partì del 1540 infina a la sò mort. L’era el bagaj del Fedarigh II Gonzaga, duca de Mantova, e de la Margarita Paleolega, marchesa del Monferrad.[1]
L’è suzzedud al pader coma duca de Mantova a la mort de quest chì, ocorsa quand che el gh’haveva set agn apena. Inanz che el vegness un hom fait, el ducad l’è stait ret di sò barba: l’Ercol e el Ferrant Gonzaga, ch’eren vegnud i tutor del bagaj.
El s’è smorosad con la Catarina d’Asborgh, che l’ha maridad a Trent el 22 de occiover del 1549, a l’etaa de sedes agn. Tamen, el mariozz l’è indait inanz minga tant: duu mis adree che la sposa l’era rivada a viver a Mantova, el duca l’è borlad denter ind un lagh giazzad intanta che l’era dree a cascià, e inscì el s’è ciapad una bruta polmonita. Depos un moment indova a somejava che el se fudess tirad su, el malann l’è pesgiorad e l’è morud adree ai festesgiament de Carnoval. L’è stait interrad ind la Basilega palatina de Santa Barbara.[2]
A la sò mort, la Catarina la tornè indree in Austria, e el ducad de Mantova el passè al fradell piscinin Ghielem, ancamò sota la tutella di barba Ercol e Ferrant.
Referenze
[Modifega | modifica 'l sorgent]- ↑ Parrott, David (1997). "The Mantuan Succession, 1627–31: A Sovereignty Dispute in Early Modern Europe". The English Historical Review CXII, Issue 445, February (445): 20–65. Oxford Academic. DOI:10.1093/ehr/CXII.445.20.
- ↑ Il cimitero ducale
Ligam de denter
[Modifega | modifica 'l sorgent]Ligam de fœura
[Modifega | modifica 'l sorgent]
Wikimedia Commons el gh'ha dent imagin o alter archivi su Franzesch III Gonzaga
