Fator de potenza
|
Quest articol chì l'è scrivud in lombard, con la Noeuva Ortografia Lombarda |
El fator de potenza a l'è, in l'eletrotecnega, el raport in tra el poder real ciapad de 'n caregh eletrigh e 'l poder aparent che 'l sgira in del circuit, che 'l val domà in di sistema alimentad a corrent alternada, che 'l po vesser representad anca 'me un triangol fad a partì di vetor del poder aparent e real, el che terz lat a l'è el poder reativ.
In di caregh resistiv, de solet, el fator a l'è de vun, o propi vesin, menter in di caregh indutiv o capacitiv el se sbassa, perchè corrent e tension vann foeura de fas.
In di ambient domestigh, de solet, el cunta no inscì tant e i compagnie meten in cunt domà el poder real, menter in di industrie, indova che gh'è tancc motor e aparecc che poden sbassàll de bon, con ris'c per la red eletriga, se paga per el poder aparent e ghe poden vesser di oblegh e di sanzion per quei che gh'hann un fator bass.