Endocarpo

Quest articol chì l'è scrivud in lombard, con la Noeuva Ortografia Lombarda

L'endocarpo (ciamad gandola se l'è de legn) l'è la part pussee interna di frut carnos, o ben quella che la contorna la somenza. Insema a l'epicarpo (che 'l fà su la "scorza" del frut) e al mesocarpo (che 'l ciapa denter i tessud situad intra l'epicarpo e l'endocarpo) el fa su el frut (o pericarpo) carnos.

El frut carnos ver e proppi el po vesser a bon cunt de du tipi: drupa o borlin.

• In la drupa l'endocarpo l'è de legn e 'l contorna l'unegh tochell de somenza. La consistenza l'è quella del legn per via de la presenza de sclereidi, o ben de cellule morte pressapoch isodiametriche con una pared spessa e impregnada de lignina. Di endocarpi molto conossud inn el guss de la nos, del persegh, de la sciresa.

• In del borlin, quand che l'è madur, despess l'endocarpo l'è unid insema al mesocarpo e 'l gh'hà una consistenza carnosa. La somenza de solit la compred tanti tochei. Un esempi famos l'è quell del tomates. Un quai borlin particolar el merita una mezion special. In del borlin di Rutaceae (agrum), ciamad esperidio, l'endocarpo è l'è la membrana sutil che la contorna ogni fesa. La part carnosa l'è una formazzion noeuva, fada su de emergenze che gh'hann denter el gius. In del borlin del pomm granad, ciamad balausti, el tessud che 'l se forma in conseguenza de l'union del mesocarpo e de l'endocarpo el gh'hà una consistenza membranosa e 'l comprend di incav che gh'hann dent la somenza.