El prenzep-sciat

Quest articol chì l'è scrivud in lombard, con la Noeuva Ortografia Lombarda

El prenzep-sciat l’è un cunt de fade todesch regolt di fradei Grimm e publegad ind el sò liber Cunt de bagaj e del fogolar vegnud fœura ind el 1812. L’è el prim cunt de la regœuja.^[1]

Trama

A gh’era una vœulta, tant temp indree, una prenzipessa egoista adree a menàss ind un bosch per sgiugà. La se seta sgiò de banda a una fontana, ma la balla dora che la gh’ha in man la ghe borlona via e la ghe borla denter ind l’aigua. La prenzipessa la taca a piansger, infina a quand l’odiss una vosina che la ghe domanda cossa gh’è. Lee la se varda in sgir, ma la ved propri nissun. De bot, la se incorsg che quell che l’è dree a parlàgh insema a l’è nò una persona, ma un sciat vegnud su de la fontana. El sciat el se ofriss de indà a catàgh la balla in scambi de la sò mesizzia. La prenzipessa la ghe dis de sì, ancaben che la saja minga inscì convencia de l’acord; de facc, la capiss nò cossa el gh’haiva a vedé un brut sciat de aigua sporca con la fiœula de un rè.

El dì adree, la prenzipessa l’è dree a disnà cont el bobà, quand che el sciat el bat al porton del castell per ciamà de fàll intrà. El rè el ghe dis a la sò tosa che la gh’ha de mantegnì la promissa che la gh’ha fait, e donca la prenzipessa la va a dervìgh. El sciat el se seta sgiò de banda a la prenzipessa e el taca a majà del piat sò de lee; apœus a tut quest el ghe domanda ancasì se el pœuda indà a possà ind el sò lecc. L’ideja de dormì insema a un sciat la ghe fa propri schivi, ma el rè el ghe vosa adree che la gh’ha de havégh respet de quii che la vuta ind el moment del besœugn. Donca, la cata su el sciat e se le porta ind la sò camara de lecc, cont el lassàll sgiò ind un angolin. El sciat, però, el ghe solta subet in sul lecc e el ghe dis che anca lu el vœul stà comed compagn de lee. Ingnechida, la slanza el sciat contra al mur, ma lu el se transforma ind un bell prenzep. Lu el ghe despiega che l’era stait instriad de una stria, e che l’instriadura la podeva vesser scassada nomà cont el socors de una prenzipessa. El dì adree, i duu vann a stà de cà ind el regn de prenzep indova i se mariden.

Ind i version pussee moderne, la transformazzion del prenzep l’ocorr perchè la prenzipessa la ghe da un basin^[2] e, in oltre version pussee vegge, l’è assee che el prenzep el dorma in sul cossin de la prenzipessa per trè nocc de fila.^[3]

Galaria dei inlustrazzion

La prenzipessa l’incontra el sciat aprœuv a la fontana
El sciat el ciama de indà denter al castell
El sciat el ghe maja ind el piat de la prenzipessa
El sciat el se vœulta ind un prenzep
L’isposalizzi

Referenze

↑ Ashliman, D. L. (2005). The Frog King or Iron Heinrich.
↑ Heiner, Heidi Anne. "The Annotated Frog King"
↑ Thompson, Stith. The Folktale. University of California Press. 1977. p. 102. ISBN 0-520-03537-2

Olter proget

Wikimedia Commons el gh'ha dent imagin o alter archivi su El prenzep-sciat

[:0-1] Ashliman, D. L. (2005). The Frog King or Iron Heinrich.

[2] Heiner, Heidi Anne. "The Annotated Frog King"

[3] Thompson, Stith. The Folktale. University of California Press. 1977. p. 102. ISBN 0-520-03537-2

[1]

[2]

[3]