Efesit Capitel Trii

Quel articul chì l'è scrivüü in Lumbard, cun l'urtugrafia insübrica ünificada.

Efesit

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Trii

¹Per via de chèst, mì, Paul, un presunee de Crist Gesü per vialter, i naziún, ²se avii sentii l'aministraziún de la grazia de Diu che la m'è stada dada per vialter, ³che el misteri l'è staa faa savüü a mì travèrs un revelaziún, propi cumè huu scritt prima curtamént, ⁴al qual, quand legii, pudii percepì la mia cumprensiún in del misteri de Crist. ⁵Chèll che l'è minga staa faa savüü a alter generaziún, a i fiöö di vèss üman cumè adèss l'è staa revelaa a i sò apostul sant e prufètt in del Spirit, ⁶perchè i naziún sien ered, un corp e culegh insèma de la prumèssa in de Crist Gesü per mèzz del vangel, ⁷del qual sun devegnüü un minister travèrs el regall de la grazia de Diu che 'l m'è staa daa travèrs l'ativitaa de la sua forza. ⁸A mì, mén di püssee pocch de tücc i sant sun staa daa chèsta grazia de nunzià a i naziún la incumprensibila richéza de Crist ⁹e de mussà l'aministraziún del misteri che l'è staa scundüü di etaa in de Diu che l'ha creaa tüsscoss, ¹⁰perchè adèss la sia fada savüda a i prenzipi e i auturitaa in di lögh di cél per mèzz de la gésa la saviéza de tant culúr de Diu, ¹¹segund el pruposit di etaa che l'ha faa in de Crist Gesü, el noster Signúr. ¹²In de chèst gh'èmm la franchéza e l'andit in de cunfidénza in de la sua fedeltaa, ¹³dunca, dumandi che devegnarìuv no strach in di mè tribulaziún per vialter--l'è la vostra gloria.
¹⁴Per via de chèst, m'inchini i genögg al Pader, ¹⁵del qual ogni famèja in di cél e sü la tèra l'è numinaa, ¹⁶perchè 'l ve daga, travèrs la richéza de la sua gloria, de vèss faa fort cun puténza per mèzz del Spirit Sant al vèss üman de denter, ¹⁷che Crist el staga de cà per mèzz de la féd in di voster cör, radisaa e fundaa in del bén, ¹⁸perchè gh'abiuv pudè assee de brancà cun tücc i sant cossa l'è la largéza, la lunghéza, l'altéza e l'afunditaa, ¹⁹e de cunuss el bén de Crist, che 'l surpassa la cugnussénza, perchè siuv impienii de tüta la pienéza de Diu.
²⁰E a lü che l'è capaz de fà, pü de tüsscoss, pü che bundantamént, quijcoss che dumandum o pensum travèrs la puténza che l'opera in de nümm, ²¹a lü la sia la gloria in de la gésa e in de Crist Gesü a tücc i generaziún per semper, amén.

Navigaziun

• ← Indree a Capitel Düü
• Inanz a Capitel Quater →
• A l'indes