Eddie Guerrero

De Wikipedia
La frog splash
Ol Eddie destendìt sö i córde del ring
Ol Eddie Guerrero ‘nsèma la Rey Mistirio co la sintüra de campiù

Ol Eduardo Gory "Eddie" Guerrero Llanes (El Paso, Texas, 9 de Otùer del 1967Minneapolis, Minnesota, 13 de Noèmber del 2005) l’è stàcc ü lotadùr de wrestling profesiunìsta nasìt in de la famèa de lotadùr di Guerrero.

L’à combatìt in Mèsico e ‘n Giapù e sura de töt in di Stacc Ünìcc in de la Extreme Championship Wrestling (ECW), in de la World Championship Wrestling (WCW) e ‘n de la World Wrestling Entertainment (ciamàda prima WWF, pò cambiàda ‘n WWE).

I sò slògan piö cognusìcc i éra Latino Heat – "Cólt Latì", Cheat to Win – "Imbroià per vèns" e I Lie! I Cheat! I Steal! - "Mé contè sö di bale, mé ‘mbròie, mé róbe" sènsa desmentegà Viva la Rassa.

Nonostànt i sò slògan i dàghe l’ìdea de ü lotadùr catìf l’è stacc ü di wrestler piö amàcc del sò tép, dezà che l’ gh’à sèmper vüt ön ategiamènt de guascù e de spacù piö che de catìf, isè i se regórda ol sò ‘ngrès ‘n scéna sö di machine che riàde söta al ring i se metìa a saltà sö i dò röde denàcc, öpör lü destendìt sö i còrde del ring che l’ ghe da la bàla a i sò aversàre, öpör quando a i spàle de l’àrbitro l’ ciapàa la scagnìna e l’ la pasàa al sò aversàre e pò l’ se bötàa ‘n tèra e l’ fàa fìnta de ès istàcc ciapàt a scagnàde isé che quando l’àrbitro l’ se ‘ncurzìa l’iscualificàa ‘l sò aversàre.

I sò mòse piö cognusìde i éra three amigos che i éra ü triple vertical suplex e la frog splash, la sò mòsa finàl, cioè ol splash de la rana; per fàla l’ saltàa da la sìma di tri córde al bòrd del ring söl so aversàre destendìt in tèra ‘n mès al ring e .

Eddy Guerrero in de la sò carìera l’à enzìt 23 tìtoi e tra chès-ce ol WWE Championship e dòpo la sò mórt l’è stài metìt in de la WWE Hall of Fame in del 2006.

Tra i wrestler sò amis se regórda ol Chris Benoit e 'l Rey Mistirio col quàl l’à enzìt ol titol de còpia.

In de la sò carìera ol Guerrero l’ gh’à üt di problémi de alcol, de abüzo de analgèsich e fòrse de sostànse dopànt.