Dario Greggio

Quest articol chì l'è scrivud in lombard, con la Noeuva Ortografia Lombarda

El Dario Greggio (Turin, 5 de marz 1967) a l'è un informategh, scritor e personagg de l'Internet italian, cognossud soratut per i so video de opinion e vlog, indova che despess a l'è inrabid.

Biografia

Nassud a Turin in del 1967, el se diploma al licee scientifegh Marie Curie de Grugliasco in del 1985, el va per du agn a fà ingegneria eletronega, senza laureàss. Sgiamò de sgioven l'era ativ in del mond de la tecnologia, a 19 agn l'ha vensgiud un premi e l'ha cracad vari software per el Commodore 64.

El taca poeu a lavorà in del camp de l'informatega e de la domotega, insema a di so amis cont i che 'l fonda la società ADPM Synthesis in del 1992, che per di dissidi interni la se desliga in del 2009.

In del 2013 a l'è condanad per eror per trufa del tribunal de Pisa, anca se l'éra stad lu vitima de furt de identità, e l'ha podud no dà su recors per di reson tecneghe, roba che 'l mena a andà poeu via de l'Italia e a desvilupà 'n oeudi per el Pajes e la zona de la Val Sangone, tant de vesser ricoverad per do setimane in del masg 2014 per havé menasciad de fà soltà per ari l'asili de Trana. In del midem ann l'ha deciarad de sentìss dona, cont el nom "Cinzia".

In del 2017 l'ha desvilupad "ForgetIvrea", una scheda eletronega alternativa a Arduino e dual core e in del 2020 l'ha fad un emulator de l'Amico2000, vun di prim home computer italian.

Notorietà in su l'Internet

Intorna al 2008 el taca a vlogà i so problema cont i soci e cont i client pussee gram che el gh'ha havud, ma el deventa pussee cognossud in del 2010, grazzia a di video contra de l'alora premier Silvio Berlusconi, soratut vun che l'è spantegad fiss in la comunità de YouTube e anca remixad.

Dopo del rebellot con la giustizzia el taca a fà di video pussee inrabid, pien de insult vers i Carabiner, la giudes che l'ha condanad, i dotor de l'ospedal psichiatregh, i so vesin - che 'l ciamaven malad perchè 'l se vestiva de dona e ghe rideven adree - e in general contra di italian, pien de auguri de mort, de cancher, de malann vari e inscì via, che tachen a spantegàss soratut in del 2020, quand che 'l publega un video in su la pandemia de COVID-19 per esultà del virus e rengrazziàll per mazzà i omen.

In del 2016 l'ha tolt part a 'n podcast in su la politega e l'atualità.

Oeuvere

Timewreck, 2019, ISBN 9780244777807
Antologia 1998-2017, 2018, ISBN 9780244134570
La forma delle cose avvenute, 2018, ISBN 978-0244624798
Chissà che puzza! (e altri motti famosi), 2017, ISBN 978-0244657208
Breccia nel destino, 2017, ISBN 9780244325671
17 canzoni, 2017, ISBN 9780244043148
Antologia 2, 2017, ISBN 9780244026240
Ricordo di due sogni, 2017, ISBN 9780244026219
10 piccoli imprenditori, 2017, ISBN 0244043140
Mele a Metà, 2016, ISBN 0244623708
Giorni a ritroso, 2016, ISBN 9780244324797
Promesse, 1996, ISBN 9780244625665

Riferiment