Daniele Vimercati

Chest artícol a l'è scricc in Lumbàrt, ortograféa orientàl unificàda.

Ol Mario Daniele Vimercati, (Milà, 17 de noèmber del 1957 - Milà, 27 de mars del 2002 l’è stacc ü giurnalìsta, scritùr e condutùr televisìf lumbàrt, nasìt a Milà ma cresìt a Èrfa ‘n pruìnsa de Bèrghem. Mèi cognusìt adóma col nòm de Daniele Vimercati l’è consideràt ol biògrafo del Umberto Bossi, dezà che col Bossi l’à scricc tace lìber sö la Lega Nord.

La sò éta

Dòpo la matürità scientìfega, ‘l s’è laureàt in giürisprüdènsa a l’Üniversità Catòlega de Milà e de lé l'à tacàt a laurà cóme giurnalìsta. Ol sò prim incàrech ‘l l’à troàt al Giornale di Bergamo, pò l’è pasàt a L’Eco di Bergamo e 'n del 1987 l’è stài ciapàt a Il Giornale, ndoe alùra l’éra diretùr 'l Indro Montanelli. In chès-ce agn ol Vimercati l’à capìt, e fòrse l’è stacc ol prim giurnalìsta a riàga, ol significàt polìtech de la Lega Nord che l’éra alùra dré a möf i sò prim pas.

In del avrìl del 1995, dòpo che ‘l Montanelli l’ìa lasàt ol Giurnàl per fà nas La Voce e al sò pòst l’è riàt ol Vittorio Feltri, ol Vimercati l’è dientàt ol diretùr de L’Indipendente, ndo che l’è restàt infìna al fevrér del 1996. Lasàt pò L’Indipendente ‘l s’è ‘mpegnàt per fà nas ü giurnàl d’àrea ciamàt “Il Nord” che l’è egnìt fò con ü nömer adóma ol 15 de setèmber del 1996, ol dé che la Lega Nord l'à facc la dichiarasiù de Indipendènsa de la Padania. Tra ‘l avrìl del 1997 e ‘l mas del 1998 l’è stacc ach diretùr del setimanàl Il Borghese. Fò sùra l’éra editorialìsta de Il Giorno e gh’è stacc ach domandàt de dientàn ol diretùr.

Insèma a la càrta stampàda l’à lauràt ach in televisiù, a Telelombardia, ‘ndoe l’è dientàt diretùr e ‘ndoe la metìt in pé öna trasmisiù, che l’è söbet indàcia fört: Iceberg. In chèsta trasmisiù i è pasàcc i piö mportàncc polìtech di chi agn, compàgn del Berluscù e del Rutelli. L’è dientàda famùza chèla püntàda 'ndo che 'l Vimercati ‘l gh’è riàt a fàga confesà al Maurizio Gasparri i nòm di giurnalìsti che i ghe piazìa mia a chi del sò partìt e che i avrès völìt casà vià; con chèsta confesiù che ‘l gh’è riàt a tiràga fò de bóca, ‘l Vimercati l’à tiràt in pé ü gran gazeghé che l’è fìnìt sö töcc i giurnài e sö töte i televisiù.

Ol Daniele Vimercati l’à scricc fò sùra tàce lìber e i sò lìber i pàrla suradetöt de polìtica e i è dedicàcc al federalìsm e a la Lega Nord, ma i manca mia i laurà dedicàcc a la Bergamàsca compàgn de Sui colli di Bergamo o la Storia di Bergamo a fumetti dall'unità d'Italia ai giorni nostri, menimà l’è ü lìber d’inchièsta chèl scricc ‘nsèma al Carlo Brambilla intitulàt Gli annegati. Il giallo dei Bisaglia e altri misteri che 'l cönta sö la stòria de la mórt del senadùr Antonia Bisaglia e del sò fradèl prét, töi dù mórcc negàcc.

Ol Daniele Vimercati ‘l s’è malàt de leucemìa e de lé póch l’è mórt a Milà ol 27 de mars del 2002.

I sò lìber

P. Capellini, M. Jannucci, R. Ravanelli, M. D. Vimercati, Sui colli di Bergamo, Grafica e Arte, 1980;
C. Cattaneo, D. Vimercati, N. Bobbio, Stati uniti d'Italia: il federalismo, le leghe, SugarCo, 1991.
La politica tra odio e amore: intervista di Daniele Vimercati a Beppe Facchetti, introduzione di Sergio Pininfarina, s.n., 1992;
Il Bossi pensiero: 1979-1993, la prima raccolta di scritti e discorsi per capire chi è e che cosa vuole davvero l'uomo più temuto d'Italia, a cura di U. Brindani e D. Vimercati introduzione di Enzo Biagi, Panorama A. Mondadori, 1993;
Storia di Bergamo a fumetti: dall'unità d'Italia ai giorni nostri, a cura di R. Ravanelli, D. Vimercati, disegni di B. Bruni e P. Di Pietrantonio, Grafica e Arte, 1994;
D. Vimercati, I lombardi alla nuova Crociata. Il «Fenomeno Lega» dall'esordio al trionfo. Cronaca di un miracolo politico, ed. Mursia, 1990;
D. Vimercati, U. Bossi, Vento dal Nord: la mia Lega, La mia vita, Sperling & Kupfer, 1992;
D. Vimercati, U. Bossi, La Rivoluzione. La Lega: storie e idee, Sperling & Kupfer, 1993;
D. Vimercati, U. Bossi, Tutta la verità. Perché ho partecipato al governo Berlusconi. Perché l'ho fatto cadere. Dove voglio arrivare, Sperling & Kupfer, 1995;
D. Vimercati, U. Bossi, Il mio progetto: discorsi su Federalismo e Padania, Sperling & Kupfer, 1996;
C. Brambilla, D. Vimercati, Gli annegati. Il giallo dei Bisaglia e altri misteri, Dalai Editore, 1997;
D. Vimercati, U. Bossi, Processo alla Lega. Le accuse di magistrati e giornalisti L'autodifesa del leader padano. Un duello ad armi pari, Sperling & Kupfer, 1998.