Cyclamen purpurascens

Chest artícol a l'è scricc in Lumbàrt, ortograféa orientàl unificàda.

Cyclamen purpurascens
or.: bàchere, ciclamì
Classifigazion sientífiga
Regn: Plantae SubRegn: Tracheobionta Division: Magnoliophyta Clas: Magnoliopsida Subclassa: Dilleniidae Ùrden: Ericales Famìa: Primulaceae Sota-famìa: Myrsinoideae Zèner: Cyclamen Spéce: C. purpurascens
Nomm binomial
Cyclamen purpurascens Mill.

Cyclamen purpurascens (en bresà cunusìt col nòm popolàr de bàchere, bàcare o ciclamì) l'è 'na spéce de piànta che fa part de la famìa botànica de le Primulaceae. L'è uriginària de l'Europa.

Cyclamen purpurascens.

Descrisiù

L'è 'na piànta tuberùza, che öl dì che 'na part del chèl che 'l sarès el fùsto la se tróa sotatèra (compàgn de le patàte). De chèsta patàta ve fò le raìs, ma böta pò a le parcc epigee (chèle che stà de sùra de la tèra) cioè le fòie e i fiùr. La part epigèa la mizüra dei 5 ai 15 ghèi de altèsa. I fiùr i vé 'mpolenàcc de insècc e i sò fröcc i vé portàcc en gir de le furmìghe.

I fiùr i g'ha 'n culùr tìpich che l'è 'ntramès 'ntra 'l rós e 'l viòla, de rar biànch. I crès ensìma a 'n gambì de longhèsa vària e che 'l compàr al stès tép che le fòie. El càles l'è lónch quàze compagn del tübo de la coròla, a ólte pò a de piö, e 'l prezènta diviziù acùte. I fiur i fiorés 'ntra l'istàt e 'l prensépe de l'autùno, e i g'ha 'n bù udùr.

Le fòie i è spèse e scorzégne, le g'ha fùrma a cör o a rugnù. La part de sùra la g'ha dele màce piö ciàre, la part de sóta de sòlet la tìra al rós.

Distribusiù e habitat

L'è uriginària dei bósch ömecc, schiàcc del sul e col teré calcàreo de la zòna centràla e meridiunàla de l'Europa: Austria, Repüblica Ceca, Germània, Ungherìa, Polònia, Slovàchia, Svìsera, ex-Yugoslavia, Italia e Frància.

Sinònim

• Cyclamen europaeum L.

Colegamèncc estèrni

Wikimedia Commons

al gh'a dent roba culegada a:

Cyclamen purpurascens