Creta

Quel articul chì l'è scrivüü in Lumbard, cun l'urtugrafia insübrica ünificada.

Creta

Creta (Κρήτη, Kriti in grech, "Krétē" in grech antich; Crète in frances; Crete in ingles; Girit in türch), l'è un isula del mar Egee che l'è suta l'aministrazion de la Grecia. L'è l'isula püssee granda de la Grecia e la quinta (8 261 km²) intra quij del mar Mediterani. L'è vöna di tredes region aministrativ de la Grecia.

Geugrafìa

'L nom de l'isula l'è per via che gh'è un mügg de creta, un material druvaa da i abitant per fà arnes e vas. L'isula la gh'ha una furma strencia e longa e la divid 'l mar Egee dal mar libich. La gh'ha un teritori muntagnus, cun dumà una percentüala picinina de pianüra. Intra quest, i püssee impurtant i henn la piana di Messarà, int la zona center-meridiunala, e 'l pian de Lassithi, che l'è püssee a nord.

Per i muntagn, i püssee impurtant i henn:

• Lefka Ori (i muntagn bianch) ch'i riven a tucà i 2452 meter
• La cadena del mont Ida che 'l riva ai 2456 meter
• Dikti Oros, che 'l gh'ha una sima de 2146 meter.

Una foto satelitara de Creta

La isula de Gaud, che l'è separada da Creta ma l'è suta la sò aministrazion, la gh'ha 'l pont püssee a sud de tüta l'Europa, che 'l se ciama Capo Tripiti.

Aministrazion pulitiga

A Creta gh'è quater prefetür:

• Prefetüra de Candia
• Prefetüra de Réthymno
• Prefetüra de Lasíthi (caplögh: Ágios Nikólaos)
• Prefetüra de Chaniá