Cavall de Troja

De Wikipedia
Va a: navegá, truvá
bussola Disambiguazión – Se te see dree a cercà el Cavall de Troja, on malware per compiuter, varda Cavall de Troja (informadega).
Lumbard ucidental Quest articol chì l'è scrivuu in lombard, grafia milanesa.


On detaj de La procession del Cavall de Troja, on'œuvra del Domenico Trepolo.

In di poemma omeregh, quella del Cavall de Troja l'è stada ona furbaria di Gregh per fognàss denter a la città de Troja e veng inscì la guerra, despœù de on assedi andaa inanz per pussee de des agn che l'aveva minga daa de frutt.

In de la version canonega, i Gregh i hann faa sù on cavall de legn sossenn grand indè che gh'era sconduu ona forza selezzionada di sœù omen e combattent. Hann faa donca a finta de menà via i toll cont i sœù nav e lassaa el cavall de legn lì per i Trojan tant 'mè se el fuss on trofee de guerra. Duranta la nocc, i Gregh hinn soltaa fœura del cavall senza minga fà de rumor e dervii i cancej de la città per fàggh vegnì denter el rest de la soa armada, che intratanta aveven menaa indree i nav in gran secrett vuttaa ancasì del fosch de la nocc. I Gregh i hann donca faa sù on bell rebelott e buttaa giò la città de Troja medemma, cont el mettegh ona fin decisiva a quella longa guerra chì.

A nivell de metafora, el "Cavall de Troja" a l'è vegnuu a segnifegà 'mè on stratagemma drovaa per invidà di nemis in d'on sitt seguraa e protett per pœù taccàjj ai spall quand che comenzen a 'veggh bon temp. A gh'è di virus per compiuter che ven ciamaa proppi cavaj de Troja per via de quella legenda chì.

Vuna di font pussee antigh de la storia la se pœu trovà in de l'Eneid del Virgili, on poemma epigh scrivuu in latin in di temp de l'imperador August. Anca in d'on tocch de l'Iliad de l'Omer se cunta sù de quell lavorà chì. In de la tradizzion grega, el cavall el ven ciamaa nomà "Cavall de legn" (Δούρειος Ἵππος, Doúreios Híppos, in del dialett jonegh).