Castle

Quest articol chì l'è scrivuu in lombard, grafia milanesa.

Castle l'è ona serie televisiva statunidensa trasmttuda da la ABC dal 2009. I dò attor principai hinn el Nathan Fillon e la Stana Katic. La serie la parla de on scrittor de liber giald, el Richard Castle che 'l collabora cont ona detective de la Polizia de New York, la Kate Beckett, despoeu avè risoluu on cas che 'l era pròppi istess de on liber del Castle.

Trama

Questa vos o sezion la pò contegnì di anticipazion in su la trama e/o el final de 'n oeuvra.

Per savenn pussee, varda i articoi Kate Beckett#Biografia e Richard Castle#Biografia.

Castle el cunta su l'inconter in tra 'na poliziotta, la Kate Beckett, e on scrittor, el Richard Castle. Se a l'inizzi squasi se oeudiaven, cont el temp vegnen semper pussee vesin, tant che 'l Castle el se innamora de la Beckett. In di vari indagin el Castle el descovriss che la Beckett l'è ossessionada del cas de la sò mamma, coppada de 'na red de poliziott corrott, e lee la sutta a indagà.

A la fin de la terza stagion la Beckett la descovriss che 'l sò capo, el Roy Montgomery, l'era inzigaa in l'affar de l'omicidi de la mader, ma che l'aveva semper protegiuu lee. E per fàll debon el moeur, in d'ona azion fada per coppà i corrott che voreven mazzà la Beckett. Però al sò funeral on cecchin el sbara a la Becket, che l'è squasi morta. E liliscì el Castle ghe dis de amàlla, ma lee la voeur desmentegà tuscòss de quell di.

Donca la quarta stagion l'è tutta fondada in su 'n Castle che 'l voeur ben a la Beckett e 'l pensa che lee 'l sapia no, ma a la fin, dopo 'n poo de limonà quasi giugos in tra i du, quand che a la fin de la stagion la dis a 'n sospettaa, denanz del Castle, de regordàss tuscoss del dì che gh'han sbaraa, e dopo 'n quaj di lee la troeuva 'na pista per descovrì anca el cecchin che l'eva provaa a coppàlla, el Castle el se deciara de noeuv, e se a l'inizzi lee l'era inversada perchè lu el gh'eva sconduu di proeuv per protegèla e fàlla indagà no, a la fin, dopo di sò dimission de agent e avè res'ciaa de morì, la va del Castle e 'l ghe dis che anca lee 'l ama e se basen, e poeu fann l'amor.

A l'inizzi de la stagion quella de cinch vegnen squasi beccaa a fà l'amor, e riessen a trovà, cont on'importanta operazion de polizia on dossier che 'l podaria compromett on Senator important. A la fin la Kate Beckett la riva a 'n accord cont 'sto Senator, per vess protegiuda in cambi de compromett no la soa carrera politega, e la vegn reintegrada in Polizia.

A la fin de la stagion quella de cinch el Castle el ghe domanda a la Beckett de sposàss e accetta a l'inizzi de quella de ses, e la accetta anca on important lavorà a nivell de polizia federala. Pocch dopo però a l'è licenziada, e donca la torna in la polizia de New York, cont Castle 'me partner.

Tutta la stagion quella de 6 a l'è incentrada in sui preparativ del matrimoni in tra lor du, che 'l finiss cont el final de stagion indova i gh'ha de cercà vun cont che la Beckett la s'era sposada de giovina per el nullament e vegnen rapii de la mafia, per poeu salvàss.

Però a l'inizzi de la stagion quella de 7 Castle a l'è mandaa foeura strada quand che l'era dré andà al matrimoni, e 'l descompariss misteriosament per on para de mes.

I indagin menen a la possibilità che 'l sia staa rapii, anca se in origin pensaven che 'l fuss scappaa per sposà no la Beckett. Reprenden subit a frequentàss, anca se originariament voreven speccià on poo prima de sposàss, ma dopo che 'l Castle l'ha sognaa on futur senza el sò inconter se sposen in forma privada.

Personagg

Principai

• Kate Beckett (stagion 1-8): Detective de prima class del NYPD, entrada in polizia per resoeulv l'omicidi de la mader e mittuda in colaborazion forzada cont el Castle. A l'inizzi l'era no 'na colaborazion civil, ma cont el temp vegnen amis streng, semper pussee vesin a vegnì vergott pussee.
• Richard Castle (stagion 1-8): Scrittor de liber giald in crisi creativa dopo avè coppaa el sò personagg pussee important, el jutta la Polizia in del resoeulv on cas compagn de quell de 'n sò liber. El vegn poeu autorizzaa stabilment a fiancà la Beckett.
• Javier Esposito (stagion 1-8): Ex member di forz speciai, l'è on detective calm e tranquill, che 'l jutta la Beckett. In l'edizion italiana l'è ciamaa a la napoletana "Espòsito", inveci che a la spagnoeula, vist che l'è ciarament de l'America Latina.
• Kevin Ryan (stagion 1-8): Allegher detective de l'omicidi, l'è al servizzi de la Beckett.
• Roy Montgomery (stagion 1-3): Capo de la Beckett in di primm trè stagion, el moeur coppaa in d'ona operazion de polizia.

Recorrent

• Alexis Castle (stagion 1-8): Fioeula del Castle, l'è ona tosa brava e responsabil, de sicur pussee del pader, che l'è ligada sossenn.
• Victoria Gates (stagion 3-7): Capa de la Beckett da la mort del Montgomery, l'è 'na tipa assee dura e la ved mia ben el rapport in tra la Beckett e 'l Castle.

Secondari

• Martha Rodgers (stagion 1-8): Mamma del Castle, la lavora in del teater.
• Gina Cowell (stagion 1-3): Editor ed ex miee del Castle, matrigna de l'Alexis, che l'è in bon rapport.
• Jim Beckett (stagion 1-8): Pader de la Beckett.
• Josh Davidson (stagion 3-4): Cardiochirurgh fidanzaa per pocch cont la Beckett, vun di primm a operàlla dopo el tentativ de omicidi.
• Michael Smith (stagion 4-8): Omm cont i dossier che servissen a garantì la vita de la Beckett.