Carlo Ghidelli

Quest articol chì l'è scrivud in lombard, con la Noeuva Ortografia Lombarda

El Carlo Ghidelli (Fanengh, 24 de avril 1934) a l'è un arcivescov e biblista italian, arcivescov emerit de Lanciano-Ortona.

Biografia

Nassud a Fanengh, el studia in del seminari vescovil de Crema e 'l 28 de sgiugn 1958 l'è ordenad sacerdot del Placido Maria Cambiaghi: el va poeu a studià teologia a la Pontificia Università Gregoriana de Roma e 'l ciapa poeu la licenza in Sacra Scritura al Pontifizzi Istitut Biblegh.

El resta al servizzi de la diocesi de Crema, indova che l'è stad anca secretari del vescov e responsabel de l'Azzion Catolega: 'me biblista, l'insegna del 1970 al 1982 in la Facoltà Teologega de l'Altitalia. El lassa tucc i incaregh per deventà sorasecretari de la Conferenza di Vescov Italiana, indova che 'l resta fina al 1986, ann che l'è fad assistent eclesiastegh de l'Università Catolega del Sacher Coeur, indova che 'l resta fina al 2000, e consultor del Pontifici Consili per l'Unità di Cristian.

Ministeri de vescov

El 25 de november del 2000 el papa Giovann Paol II el nomina arcivescov de Lanciano-Ortona, in sostituzzion de l'Enzio d'Antonio, che 'l s'era dimetud perchè l'era deventad vegg: el 14 de sginer inanz el Giovanni Battista Re, al temp prefet per la congregazzion di vescov, ghe dà l'ordenazzion de vescov in la Catedral, insema al so predecessor e al vescov de Crema Angelo Paravisi: l'istess dì el ciapa possess de la sed.

Del 2004 al 2010 l'è stad anca president de la conferenza di vescov de l'Abruzz e del Molis.

El 11 de otover 2010 el se dimet anca lu per l'età e 'l papa Benedet XVI i recoeuj: el resta ministrador apostolegh fina al rivà del so sucessor Emidio Cipollone, vegnud vescov el 18 de dicember inanz, e che 'l ordinarà lu.

El se retira a Milan, in la Gesa de san Franzesch al Foponin.