Cità Volta (Berghem)
|
Quest articol chì l'è scrivud in lombard, con la Noeuva Ortografia Lombarda |
La Cità Volta (anca Berghem de Sora, in italian la se ciama Città Alta o anca Bergamo Alta) a l'è el quarter storegh de Berghem, d'epoca medieval, sit in su 'n coll, de chi el nom de Sora.
El so nucli a l'è la Piazza Veggia, che arent gh'è el Dom, ma l'è importanta anca la citadella viscontea, fada su di Vescont quand che governaven la cità, e l'è marcada di mure venete, fade su de la Republega de Venezzia per protesger el so confin pussee ocidental. In la zona gh'è vari musee: quell Archeologegh e quell de storia natural inn propi in la citadella, poeu gh'è el Musee del Donizet, el Musee e tesor de la Catedral, arent al Palazz de la Reson e l'ort botanegh de Berghem "Lorenz Roeuda". Inn visitabel 'me musee anca la Roca de Berghem, el Convent de San Francesch e 'l Campanon. L'è de vedè anca la basilega de Santa Maria Magior, con la soa capella del Colleon.
El sit l'è ben caraterizad anca de tante fontane, tant 'me el fontanon viscontee, la fontana de Antescolis, la fontana Contarini, el lavador publegh, la fontana de San Pancrazzi e la font del Vasin.
A l'è conligada al rest de la cità di strade, indova che passen vari autobus del servizzi comunal, vun el conliga diretament la stazzion a la cità volta. A gh'è anca una funicolera che del bass el mena a Berghem de Sora, e dent di mure a gh'è 'n oltra funicolera, che la conliga la porta Sant Alissand al coll de San Vigili.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Cità Volta (Berghem)
Wikivoyage el gh'ha dent Informazzion turisteghe su Cità Volta (Berghem)
