Aròld I de Danimarca

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.
El mònegh Poppo el batezza l'Aròld Dencbloeù, probabilment 960 D.C.

L'Aròld I Gormson Dentbloeu de Danimarca (ingles: Harald Bluetooth Gormson; danes: Harald Blåtand; nors antich: Haraldr blátönn; norveges: Harald Blåtann), l'è nassuu in del 935, fioeu del Rè Gorm el Vegg e de Thyra (ciamada anca Thyre Danebod), e l'è mort in del 985 (o fòrsi in del 986). L'ha governaa come Rè de Danimarca a partì del 958.

L'Aròld I el se pò ciamà Arald Dencbloeù in version lombarda. El soranòmm el vegn de dò paròll danes: blå, ch'el voeur dì "de pell scura", e tan, "òmm grand e gròss", che insemma sònnen comè Blåtand "denc bloeu". Anca perchè in del paes di vichingh, biond de cavej e ciar de pell, on òmm scur compagn de l'Aròld el pareva pròppi compagn de on denc de color bloeu in mezz a tanti bianch. On'altra manera de spiegà el sò soranòmm l'è ch'el fudess golos de mirtill,[1] o anca la constatazion che luu el gh'aviss minga voeuja de fà la guerra, ma ch'el preferiss giugà de diplomazia.[2]

L'Aròld el s'è convertii a la religion cristiana insemma a tut el sò pòpol. L'è anca regordaa per vegh unificaa (anca se per pòcch temp) el Regn de Danimarca con quell de Norvegia e Svezia (indovè che l'ha governaa per on quaj ann intorna al 970) sòtta on'uniga coròna. L'è per chel motiv chì che la tecnologia Bluetooth l'è stada ciamada compagna de luu.[2]

Ona quaj font stòrega la dis che el Sweyn, el sò fioeu, l'ha traa giò del sò trònn in manera violenta.[3] L'Aròld I l'è descrivuu compagn de on giovin ambizios che l'ha mettuu diversi fazion vichingh in guerra l'ona con l'altra.

Referenz[Modifega | mudìfica 'l sorgènt]

  1. de la Wikipedia toscana
  2. 2,0 2,1 de la Wikipedia inglesa
  3. Anderson Poul, The Mother of the Kings; el tratta del Rè de Norvegia Enrigh Ascia de Sangh (Erik Bloodaxe in ingles) e de la sò fameja, ma ona sezion del liber la parla anca de la Danimarca.