Apucaliss Capitel Vündes

Quel articul chì l'è scrivüü in Lumbard, cun l'urtugrafia insübrica ünificada.

Apucaliss

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vündes

¹E la m'è dada una cana cumpagna d'una bachèta, disend: «Levet sü e misüra 'l témpi de Diu e l'altar e quij che 'n aduren, ²e lassa föra 'l curt de föra del témpi e no misüràla, perchè l'è daa a i naziún e 'l zamparànn adòss la santa citaa quaranta düü més. ³E daruu a i mè düü testimon e prufetizarànn mila düsént sessanta dì, vestii [in de] sacch. ⁴Chèst hinn i düü ulìv e i düü candelee che hinn staa denanz al Signúr de la tèra. ⁵E se quajdün el vör fàgh maa, fögh el va föra de la lur buca e 'l mangia i lur nemìs; e se quajdün l'avarìa vurüü fàgh maa, l'è necessari che l'è staa mazaa in de chèsta manéra. ⁶Chèst gh'hann l'auturitaa de sarà 'l cél, perchè la piuvèss no la piöva [in d]i dì de la lur prufezìa e gh'hann auturitaa sü i aqu [per] giràj in de sangh e [per] culpì la tèra cunt ogni piaga tant despèss quant vuràssen. ⁷E quand avarànn cumpii la lur testimunianza, la bestìa che la va sü de l'abiss la farà guèra cun lur e la i vingiarà la i mazarà. ⁸E 'l lur cadàver [l'è] sü la piaza de la granda citaa, che l'è ciamaa spiritüalamént Sodom e Egìtt, due anca 'l lur Signúr l'è staa crusefiss. ⁹E veden [quij] di gént e di tribü e di lénguv e di naziún el lur cadàver trii dì e mèzz e permetarànn no che i lur cadàver sien metüü in d'una tomba. ¹⁰E quij che stann de cà sü la tèra gh'hann letizia sü [de] lur e hinn cuntént e mandarànn regàj el vün a i alter, perchè chèst, i düü prufètt, hann turmentaa quij che stann de cà sü la tèra. ¹¹E dopu [d]i trii dì e mèzz el spirit de vita l'è vegnüü denter a lur de Diu, e hinn staa in di lur pee, e una granda paüra l'ha burlaa giò sü quij che i varden. ¹²E huu sentii una granda vús del cél, disendugh: «Andee sü scià»; e hinn naa sü in del cél in de la nìgula e i lur nemìs i hann vardaa. ¹³E in de chèla ura l'è devegnüü un gran teremòt, e 'l dècim de la citaa l'ha burlaa giò e hinn staa mazaa in del teremòt sètt mila nomm di vèss üman e 'l rèst hinn devegnüü stremii e hann daa gloria a Diu del cél.
¹⁴E 'l segund guai l'è naa via; varda, el tèrz guai el vén sveltamént.
¹⁵E 'l sètim àngiul l'ha sunaa la tromba, e gh'hinn sücèss grand vús in del cél, disend:
«El règn del mund l'è devegnüü [chèll] del noster Signúr
e 'l sò Crist,
e 'l regnarà in di sécul di sécul».
¹⁶E i vént quater anziann che s'hinn setaa giò sü i lur troni denanz a Diu hann burlaa giò sü i lur facc e hann aduraa Diu, ¹⁷disend:
«Te dèmm grazi, Signúr Diu ogniputént,
che l'è e che l'era
perchè t'hee ricevüü la tua granda puténza
e t'hee regnaa.
¹⁸E i naziún hinn staa faa rabiús,
e l'è vegnüda la tua ira
e 'l témp che i mort sien giüdegaa
e de dà la recumpénsa a i tò sèrv i prufètt
e a i sant e a quij che gh'hann paüra del tò nomm,
i piscinitt e i grand
e de destrügg quij che destrügen la tèra».
¹⁹E 'l témpi che l'è in del cél l'è staa dervii e l'è stada vedüda l'arca del sò testamént in del sò témpi, e hinn devegnüü lüsnad e vús e trùnn e un teremòt e granda tempèsta.

Navigaziun

• ← Indree a Capitel Des
• Inanz a Capitel Dudes →
• A l'indes