Apostuj Capitel Vintses

Quel articul chì l'è scrivüü in Lumbard, cun l'urtugrafia insübrica ünificada.

Apostuj

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vintses

¹E Agripa l'ha dii a Paul: «L'è permiss che te parlet de tì medemm». Alura Paul l'ha distendüü la man e 'l s'è staa defendüü: ²«Sü tücc i robb di quij sun cüsaa di Giüdee, rè Agripa, me cunsideri cuntént perchè me defendaruu incöö denanz a tì, ³spezialamént perchè te see espert de tücc i robb sia di custüm che di quistiún intra i Giüdee, dunca, te preghi de scultàmm cun paziénza.
⁴Defàtt, tücc i Giüdee hann savüü la mia manéra de vita de la giuentü che l'è staa del prenzipi intra la mia naziún e a Gerüsalèmm, ⁵che m'hann savüü prima, del prenzipi, se vören dà testimunianza che huu vivüü cuma Farisee segund la sèta püssee severa de la nostra religiún. ⁶E adèss sun staa in pee, giüdegaa, per la speranza de la prumèssa fada de Diu a i noster pader, ⁷a la qual i noster dudes tribü, servend cun calúr dì e nocc, speren rià, per la qual speranza sun cüsaa di Giüdee, rè. ⁸Perchè l'è giüdegaa incredibil intra vialter che Diu el leva sü i mort?
⁹Defàtt, mì huu pensaa a mì medemm che l'era necessari che mì fasessi tant robb upost al nomm de Gesü el Nazarén, ¹⁰che anca huu faa a Gerüsalèmm, e anca tant di sant mì huu saraa denter in di presún, avend ricevüü l'auturitaa di sacerdott scèff, e quand eren mazaa, davi 'l mè vud. ¹¹E in d'ogni sinagoga, despess intanta che i castigavi, i ubligavi a biastemà, e perchè seri rabiús grandamént cuntra lur, i persegütavi fin a i citaa de föra.
¹²Intra i quij, intanta che seri 'dree a nà a Damasch cun l'auturitaa e la cumisiún di sacerdott scèff, ¹³a mezzdì sü la via huu vedüü, rè, una lüs del cél püssee splendenta del suu l'ha splendüü inturna a mì e quij che andaven cun mì. ¹⁴E quand nümm tücc avevum burlaa giò sü la tèra, huu sentii una vús che la m'ha dii in de lengua ebraiga: Saúl, Saúl, perchè te me persegütet? El t'è dür stulcià cuntra i ghiár». ¹⁵E mì huu dii: Chi te see, Signúr? E 'l Signúr l'ha dii: Mì sun Gesü, che te persegütet. ¹⁶Ma levet tì sü e sta in di tò pee; già che per chèst t'huu cumparii, per numinàtt minister e testimon sia di robb in di quij te m'hee vedüü che di robb per i quij te cumparuu, ¹⁷liberandut de la gént e di naziún a i quij mì te mandaruu, ¹⁸per dervì i lur ögg, perchè giren del scür a la lüs, e de l'auturitaa de Satana a Diu, perchè lur riceven el perdún di pecaa e un'ereditaa intra quij che hinn faa sant per la féd che l'è in de mì.
¹⁹Per chèsta resún, rè Agripa, sun minga devegnüü desübediént a la visiún del cél, ²⁰ma a quij prima a Damasch, e a Gerüsalèmm, e tüta la regiún de la Giüdea e a i naziún huu pruclamaa de revedè e de girà a Diu, fasend laur dègn de revedimént. ²¹Per via de chèstcoss, i Giüdee m'hann brancaa in del témpi e hann tentaa de mazàmm. ²²Dunca, perchè huu utegnüü el jütt de Diu fin a chèst dì, stuu in pee, dand testimunianza sia al piscinin che al grand, disend nagott se no di robb che anca i prufètt e Musè hann dii che staven per süced, ²³che 'l Crist el sarìa destinaa a patì, che 'l primm de la resüreziún di mort el starìa per pruclamà la lüs sia a la gént che a i naziún».
²⁴E quand el se defendeva cun chèstcoss, Fest l'ha dii cunt una granda vús: «Te trasparlet, Paul; i tant leter te giren a la matada». ²⁵Ma Paul: «trasparli no», l'ha dii, «ecelentissim Fest, ma parli francamént paroll de la veritaa e de la sanitaa de mént. ²⁶Defàtt, el rè, al qual parli liberamént, el sa sü chèstcoss, già che sun persuas che nagott de chèstcoss l'è scundüü de lü; già che chèst l'è staa minga faa in d'un cantún. ²⁷Te credet, rè Agripa, a i prufètt? Suu che te credet». ²⁸Ma Agripa a Paul: «Te me persuadet squas a devegnì Cristian!». ²⁹E Paul: «Mì vurarìa pregà a Diu che sia in de pocch che in de grand no dumà tì ma anca tücc quij me senten incöö devegnuv tal qual sun mì, al föra de chèst ligamm».
³⁰E 'l rè 'l s'è levaa sü, e cun lü 'l capp, Berenice e quij che s'eren setaa giò cun lur, ³¹E despö che aveven ritiraa, se parlaven el vün cunt i alter, disend che: «Chèst omm el fa nagott dègn de la mort o ligamm». ³²E Agripa l'ha dii a Fest: «Chèst omm el pudeva vèss liberaa, se 'l se füss minga apelaa a Cesar!».

Navigaziun

• ← Indree a Capitel Vintcinch
• Inanz a Capitel Vintset →
• A l'indes