Apostuj Capitel Desnöv

Quel articul chì l'è scrivüü in Lumbard, cun l'urtugrafia insübrica ünificada.

Apostuj

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Desnöv

¹E l'è sücess quand Apoll l'era a Curint che Paul, despö che l'aveva passaa per i part süperiúr, l'ha vegnüü a Efés e l'ha truaa quij discepul, ²e l'ha dii a lur: «Avii ricevüü 'l Spirit Sant quand avii credüü?». E lur gh'hann dii: «Ma gnanca èmm sentii che 'l sia un Spirit Sant». ³E l'ha dii: «Dunca, in de che cossa sii staa batezaa?». E gh'hann dii: «In del batésim de Giüann». ⁴E Paul l'ha dii: «Giüann l'ha batezaa un batésim de revedimént, disend a la gént che gh'avarien de créd in de lü che 'l vegniva despö de lü, l'è de dì, in del Gesü. ⁵E despö che l'aveven sentii, hinn staa batezaa in del nomm del Signúr Gesü, ⁶e despö che Paul l'aveva metüü i man sü lur, el Spirit Sant l'è vegnüü sü lur, e parlaven lenguv e daven prufezì. ⁷E gh'eren tücc circa dudes omen.
⁸E despö che l'era naa denter in de la sinagoga, el parlava francamént per trii més, cunversand e persuadend sül règn de Diu. ⁹E cuma quij eren faa dür e credeven no, parland maa de la via denanz a la fola, despö che 'l s'era ritiraa de lur, l'ha separaa i discepul, cunversand ogni dì in de la scola de Tirànn. ¹⁰E l'è sücess per düü agn, che tücc che staven de cà in d'Asia hann sentii la parola del Signúr, sia Giüdee che Grech.
¹¹E Diu 'l faseva puténz no urdinari per mèzz de la man de Paul, ¹²perchè eren purtaa via panètt e scussaa anca a quij che eren malaa e eren liberaa i malatì de lur, e i spirit malign andaven föra.
¹³E quij anca di esurcist giüdee che andaven in gir hann tentaa de ciamà 'l nomm del Signúr Gesü sü quij che gh'aveven spirit malign, disend: «Ve scungiüri per Gesü, che Paul el predica». ¹⁴E gh'eren sètt fiöö d'un cèrt Sceva, un sacerdòtt scèff giüdee, che faseven chèst. ¹⁵E 'l spirit malign l'ha respundüü e l'ha dii a lur: «Mì cugnussi Gesü, e cugnussi Paul, ma vialter chi sii?». ¹⁶E la persona in de la qual l'era 'l spirit malign l'ha saltaa sü lur, e surafasend tücc i düü, el gh'aveva forza cuntra lur perchè hann scapaa via de chèla cà, biott e ferii. ¹⁷E chèst l'è devegnüü savüü a tücc i Giüdee e i Grech che staven de cà a Efés e la pagüra l'ha burlaa giò sü tücc de lur, e l'era faa grand el nomm del Signúr Gesü.
¹⁸E tant personn che aveven credüü hann cumenzaa a cunfessà e deciarà i lur aziún. ¹⁹E tant assee di quij che aveven esercitaa i art magigh, despö che aveven purtaa insèma i liber, i brüsaven denanz a tücc, e en hann calculaa i prezzi e hann truaa cinquanta mila pèzz d'argént. ²⁰Inscì segund la forza del Signúr la parola la cresseva e l'era forta.
²¹E cuma chèstcoss hinn staa cumpii, Paul el s'è metüü in del Spirit de nà a Gerüsalèmm passand travèrs la Macedonia e l'Acaja, despö che l'aveva dii: «Despö che mì sun staa là, l'è necessari che mì veda anca Roma». ²²E despö che l'aveva mandaa in de Macedonia düü di quij che 'l serviven, Timotee e Erast, lü medemm l'ha restaa un témp in d'Asia.
²³E l'è sücess in chèl témp un tümült no piscinin sü la Via. ²⁴Già che un cèrt Demetri, argentee, che 'l faseva témpi d'argént de Diana, el pruvedeva a i omen de mestee un prufitt no piscinin, ²⁵che l'aveva traa insèma cunt i lauradúr de taj robb e l'ha dii: «Omen, savii che de chèst laur l'è richéza a nümm, ²⁶e vedii e sentii che chèst Paul, avend persuadüü no dumà Efés ma squas tüta l'Asia, l'ha remuvüü assee d'una fola, disend che i robb faa di man hinn minga di. ²⁷E chèst el mett in pericul no dumà la nostra sort, che la vegna a censüra, ma anca el témpi de la dia granda Diana, che la sia cunsiderada cuma nagott, e la sua grandéza, che tüta l'Asia e 'l mund l'adura, la sarà destrüta».
²⁸E despö che aveven sentii e eren devegnüü pièn de passiún, criaven, disend: «Granda l'è Diana di Efesìtt!». ²⁹E la citaa l'è stada impienida de cunfüsiún, e hann curüü cunt una sula mént al teater despö che aveven brancaa Gaj e Aristarch, de la Macedonia, cumpagn de viagg de Paul. ³⁰E quand Paul el vureva nà denter in de la gént, i discepul el permeteven no; ³¹e quij anca di capp d'Asia, che gh'eren amìs, avend mandaa a lü, l'esurtaven de dà minga sé medemm al teater. ³²Dunca, alter criaven quajcoss'altra: degià che l'assemblea l'era cunfüsa e i püssee personn saveven no per via de che roba eren vegnüü insèma. ³³E quij de la fola hann istrüii Lissander, despö che i Giüdee l'aveven bütaa denanz; e Lissander, avend faa un sègn cun la man, el vureva defendess a la gént. ³⁴Ma despö che aveven recugnussüü che l'era Giüdee, l'è vegnüda vöna vús de tücc criand per circa dò ur: «Granda l'è Diana di Efesìtt!».
³⁵E despö che l'aveva calmaa la fola, el scriba l'ha dii: «Omen efesìtt, defàtt, chi 'l gh'è di vèss üman che 'l sàpia no che la citaa di Efesìtt l'è vardian de la granda Diana e chèll che l'è burlaa giò de Giuv? ³⁶Dunca, degià che chèstcoss pöden minga vèss cuntradii, l'è necessari che siuv quiètt e faguv nagott scunsideraa. ³⁷Già che avii menaa chèst omen che hinn né culpevul de sacrilegiu né biastemadúr de la nostra dia. ³⁸Dunca, se Demetri e i omen de mestee cun lü el gh'ha una roba cuntra quajdün, i personn del mercaa hinn menaa e gh'hinn prucunsul, gh'avarìen de purtà un'acüsa el vün cuntra i alter. ³⁹Ma se cerchii quajcossa ultra de chèst, la sarà decidüü in de l'assamblea legala. ⁴⁰Già che sèmm in pericul de vèss acüsaa d'una rivolta sü incöö, perchè la gh'è nissüna causa sü la qual pudarèmm cunsegnà una parola sü chèsta riuniún». ⁴¹E despö che l'aveva dii chèstcoss, l'assemblea l'è partida.

Navigaziun

• ← Indree a Capitel Desdot
• Inanz a Capitel Vint →
• A l'indes