Và al contegnud

Poll

De Wikipedia
(Rimandad de Apollo)
Lombard Quest articol chì l'è scrivud in lombard, con la Noeuva Ortografia Lombarda
Poll e Urania, la musa de la stronomia

El Poll (gregh antigh: Ἀπόλλων, Apóllōn, latin: Apollō) l’è vuna di deitaa olimpeghe ind la Grezzia classega e ind la religion romana. L’è recognossud coma el dia dei arch e di sflizze, musega e danza, veritaa e profezzia, sanament di malagn, el sol, la lus, la poesia e oltre robe ancamò. Fiœul del Sgiœuv e de la Ladona e fredell sgemell de la Diana, deja de la cascia, l’è considerad el pussee bell de tucc i dia e l’ideal estetegh del sgiovinot.

Dia patron de Delfi, el Poll l’è un dia oragol. Coma dia dei art, el soraintend tuta la musega, ma anca la danza, la lirega, el tejater e la poesia; per questa reson, la lira l’è vun dei usadei pussee comun figurad insema al Poll. El se preocupa ancasì con la saluu di bocia e di bagaj, e a lu l’è sacher el passasg a l’etaa adulta. I cavei longh – in etaa antiga tipegh di fiolit de tucc duu i sess – vegneven tajad quand che i bagaj mas’c eren finalment vegnud grand. El dia, però, el ven depensgiud cont i cavei ancamò longh, a simbolesgià la sò sgioventura eterna.

El Poll l’è una deitaa pastoral assossenn importanta – el protesg i bestie de cassina, i osei e i camp di malatie e di predador. El dia l’incorasgiava anca la fondazzion de zitaa nœuve, e l’è perzò el patron di colonie, dei edifizzi publegh, di strade e di contrade.

Ind i temp ellenistegh, spezzialment adree al 5t segol iEC, l’è vengud a identifegàss con l’Helios, la personifegazzion del sol ind la mitologia grega.[1] Tamen, ind i test latin, i messeden minga insema i figure del Poll e del Sol inanz del 1m segol EC.[2] Donca, el Poll e l’Helios/Sol inn restait dò entitaa spartide ind la mitologia e ind la literadura infina al 5t segol iEC.

Referenze[Modifega | modifica 'l sorgent]

  1. For the iconography of the Alexander–Helios type, see H. Hoffmann, 1963. "Helios", in Journal of the American Research Center in Egypt 2, pp. 117–23; cf. Yalouris 1980, no. 42.
  2. Joseph Fontenrose, "Apollo and Sol in the Latin poets of the first century BC", Transactions of the American Philological Association 30 (1939), pp 439–55; "Apollo and the Sun-God in Ovid", American Journal of Philology 61 (1940) pp 429–44; and "Apollo and Sol in the Oaths of Aeneas and Latinus" Classical Philology 38.2 (April 1943), pp. 137–138.

Ligam de denter[Modifega | modifica 'l sorgent]

Ligam de fœura[Modifega | modifica 'l sorgent]