Ambroeus II de Arlun

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.

L'Ambroeus de Arlun (Arlun, ...-1051) l'è staa on vescov lombard.
El rivava probabilment d'ona fameja de valvassor de Arlun. L'Ambroeus l'ha faa cariera in de la Gesa milanesa e l'è vegnuu vun di omen pussee fidaa de l'arcivescov Aribert de Intimian.
In del 1027 l'è mort el vescov de Lod, Notcheri. L'Aribert alora, per via del diritt de nomina e de consacrazzion del vescov lodesan, l'ha scernii 'me sucessor proppi l'Ambroeus, e l'ha consecraa. Ma i lodesan hann refudaa la nomina, perchè diseven che l'era minga giusta che i milanes gh'avessen el diritt de scernì el vescov sò de lor. Alora l'Aribert l'ha assediaa Lod, fina a quand i lodesan hann acettaa l'Ambroeus 'me vescov e gh'hann giuraa fedeltà denanz ai mur de la città.
L'Arnolf, storegh de l'arcidiocesi milanesa, el dis che l'imposizzion de l'Ambroeus (che a bon cunt el saria staa on bravo vescov) l'è staa el princippi de l'ostilità tra Lod e Milan.