Albert de Giussan

De Wikipedia
(Rimandad de Albert de Giüssàn)
Lumbard ucidental Quest articol chì l'è scrivuu in lombard, grafia milanesa.
La statoa del Guerrier de Legnan, sociada despess a l'Albert, fada sù de l'Enrico Butti, in del 1900

L'Albert de Giussan (Alberto da Giussano in Italian; Albertus de Gluxano in Latin) a l'è staa on comandant lombard leggendari del XII secol. L'è famos per vess staa el comandant de la Compagnia de la Mòrt che, compòsta de cavalier che vegniven del Bressan e del Piemont oriental (Lissandria), l'ha contribuii a la vittòria di comun lombard contra l'Imperador Federich Barbarossa in de la Battalia de Legnan.

A dì la verità però se sa minga se l'Albert el sia esistii verament, perchè tucc i font che le nòminen a hinn de secoi pussee innanz: el primm a parlànn l'è staa el stòrich milanes Galvan Fiamma, dusent ann dòpo. A bon cunt, l'è diventaa vun di simboi del Resorgiment italian prima e de l'indipendentismo leghista poeu, tanto che l'emblema de la Lega Nord el rappresenta pròppi la statoa del giussanes che la se troeuva a Legnan. In del film del 2009 Barbarossa, dirigiuu del Renzo Martinelli, el personagg de l'Albert de Giussan l'è interpretaa de l'attor israelian Raz Degan.