March Claudi Tacit
De Wikipedia
El March Claudi Tacit, conossuu anca con domà el nòmm Tacit (Marcus Claudius Tacitus in Latin; 200 circa - giugn 276) l'è staa imperador de Roma del november 275 finna a la soa mòrt.
[Mudifega] Biografia
L'unega altra informazion sora la soa vida l'è che l'è staa cònsul in del 273, cont el Giuli Placidian. L'Historia Augusta la dis che l'era de l'istessa famiglia del famos stòrich Publi Corneli Tacit, ma l'è ona notizia minga certa.
In de l'autunn del 275, dòpo de la mòrt de l'Aurelian, l'è staa nomenaa imperador di sò soldaa; al moment lù l'era a Terni (Interamna) e, quand l'è rivaa a Roma, la soa elezion l'è stada reconossuda anca del Senaa. La soa primma azion l'è stada quella de fà diventà on dio el sò predecessor e de fà coppà on grand numer de congiuraa sospetaa de avèl massaa.
El someja che al contrari de l'Aurelian, la soa la sia stada ona politega de reconciliazion cont el Senaa. L'ha avuu i titoi de Auctor veræ Libertatis (Creator de la vera Libertaa) e Restitutor Rei Publicæ (Salvador del Statt);
La mòrt de l'Aurelian l'aveva portaa la fin di progett de campagn in Orient, per la qual eren staa soldaa di tribuu germanegh come i Erui e i Meòtid. Quest, rimagnuu senza danee, hann deciduu de devastà i region de l'attual Turchia. El Tacit l'ha allora nomenaa el sò fradelaster March Anni Florian prefett del pretòri, l'è andaa con lù in orient e l'ha vingiuu i ribej. Per quest el gh'ha avuu el soranòmm de Gothicus Maximus (El pussee grand di Gòtt).
L'imperador l'è mòrt in del giugn del 276, menter che 'l tornava in Italia. I stòrich Zòsim e Zonara disen che 'l sia staa coppaa de on quaj de autor de l'assassini del governador de la Siria Massimin e de l'Aurelian. Gh'è succeduu el Florian.
