Macchina fotografega
|
«El fotografo professionista'l se recognoss facilment in mezz al rosc de turist. A l'è quell che'l scond la soa macchina.»
|
(Roland Topor)
|
Ona macchina fotografega (anca ciamada fotocamera o aparecc fotografegh) a l'è on strument ottich drovaa per la registrazion di immagin o video, che poeu i vegnen mess via travers di sistemi de stocagg fisegh ('me el borlonin de la pellicola) o elettronegh ('me i memori removibil o i disch dür). El fonzionament de la macchina fotografega el s'è sviluppaa da quel di prime camere scure e principalment a l'è basaa in sul quel de l'oeugg uman. Ona fotocamera la pò vess on dispositiv che'l fonziona indeperluu o anca vess part d'on aparecc pussee articolaa 'me on smartphone.
El termin fotocamera el vegn sù dal dispositiv de la camera scura, che la vegniva drovada in del vottcent per scattà i fotografij.