Cesareo
El Davide Luca Civaschi, mej conossuu cont el nòmm de Cesàreo (Milan, 22 de genar del 1962) l'è on musicista italian, ghitarrista del grupp milanes Elio e le Storie Tese, in del qual el sona a partì del 1983-1984. Oltra che cont i Elii, el Cesareo el sona in del grupp Four Tiles.
Cont i Elii e con Linus el condus anca el programma radiofonigh Cordialmente.
A gh'è chi che pensa che 'l sia vun di miglior ghitarrista in de la scena italiana.
Biografia e carriera
[Modifega | modifica 'l sorgent]Per on bell poo de temp, l'ha vivuu in de la zona de Cors 22 de marz.
Tra i sò influenz musigai podom cuntà i Beatles e vari grupp rock, compagn di Deep Purple.
Prima de sonà in di Elio e le Storie Tese, Cesareo l'ha sonaa in d'on poo de grupp emergent milanes, tra i quai cuntom i Urania. Ona volta a l'ha sentii sonà i Elii (al temp el ghitarrista a l'era Elio) e l'ha capii che gh'aveven de vess el sò grupp (come che 'l dis lù in de la soa pagina in sul sitt offizial de la band). Inscì in del 1984 l'è entraa a fà part del grupp 'me ghitarrista, inscì che l'Elio l'ha poduu pensà pussee a cantà.
Oltra a la ghitarra, Cesareo el canta 'me solista in di canzon Cinquecento (Italyan, Rum Casusu Çikti) e Bacio (Craccracriccrecr); inoltra sona el campanasc in di version live de El Pube, el banjo in d'on medley acustigh del tour del 2000 (come che se pò vardà ben in del DVD The Lugano Tapes) e 'l canta in Alfieri (terza strofa) e Heavy Samba (insema a Elio e a l'Irene Grandi - o la Paola Folli in di concert). Ona caratteristiga de la soa esibizion in Alfieri a l'è quella che intant che lù l'è dree a cantà, ghe riven intorna Elio e Faso e ghe disen di robb in di oregg per fàll rid e rendegh impossibil l'esecuzion de la strofa. E despess ghe l'hann fada.
Tra i episodi pussee famos de la soa carriera cont i Elio e le Storie Tese el gh'è 'l duett (che on quaivun el dis che 'l sia staa on duell, ma lù l'è minga d'accordi) con Carlos Santana duranta ona trasmission sù RAI1 in del 1998. 'Sto episodi l'è anca regordaa in la canzon Bis (Craccracriccrecr):
|
«[...]Mentre Davide resta in disparte,
ripensa a Santana, quel giorno a Bologna...» |
(Bis, Craccracriccrecr, 1999)
|
Oltra a sonà con lor, Cesareo l'ha collaboraa cont ona motta de artista, trai quai a gh'è Daniele Silvestri e anca Claudio Bisio (canzon La droga fa male in Paté d'Animo).
A l'è staa el primm ghitarrista italian a 'vèggh on modell de ghitarra Ibanez fada proppi per lù: la RGTH57 Cesareo Model (lù el dis che la Ibanez a l'ha scernii proppi lù 'me premi per la fedeltà dimostrada a quella marca chì).
Cesareo, come emm giamò ditt, el sona anca coi Four Tiles e 'l partecipa, insema a alter ghitarrista, a la Notte delle Chitarre (la Nott di Ghitarr), organizzada del grupp Custodie Cautelari.
A l'è sposaa (o el gh'ha ona morosa) e 'l gh'ha duu fioeu, che se ciamen Valeria e Simone.
I nomm
[Modifega | modifica 'l sorgent]Compagn de tucc i alter member de la band, anca Cesareo el gh'ha 'vuu on fracch de nomm e pseudonim. Ovviament, el sò nomm offizial (che gh'è staa daa de Elio al moment del sò ingress in del grupp) el resta Cesareo: ma quest el voeur minga dì che 'l podess avègghen di alter: tra i alter nomm, regordom Cesaren, il Civas, Gorrini, Davidino Gorrini, Davidone, Cicatrice, Cesaréo, Cesare, Mimmo, Mimmo Personacchi, Abu Ach Personach, Il Personaggio, Sig. Ciobarelli, Ciuashchi, Ciuàsh, Cimasoni, Luca Gorrini, Sirvaci, Cesareo Fitasgi e Dave.
La pupart de 'sti nomm l'è 'gnuda foeura duranta i vari tourné faa del grupp, e hinn staa inventaa in sul moment o pocch prima di alter member del grupp.