Elio

De Wikipedia
Va a: navegá, truvá
Lumbard ucidental Quest articol chì l'è scritt in milanes, ortografia classega.
L'Elio el sona i bongh

El Stefano Roberto Belisari (Milàn, 30 luj 1961), mej cognossuu cont el nòmm de Elio, a l'è on cantant, musicista, compositor, attor, dobbiador, ingegner elettrònich e còmich italian. L'è famos soratutt per vess el leader e 'l cantant del grupp rock Elio e le Storie Tese, che l'ha fondaa in del 1979, quand che 'l gh'aveva 18 agn.

L'è la vos solista del grupp, ma 'l sòna despess anca el flaut travers (strument cont el qual el s'è diplomaa al Consevatòri "Giuseppe Verdi" de Milan) e la ghitara (finna al 1984, quand l'è entraa in de la formazion uffizial el Cesareo, l'era lù el ghitarista). In de la canzon Omosessualità (Eat the Phikis, 1996) el sòna el bass, perchè el bassista Faso l'amava minga el gener musegal de quella canzon (el metal) e donca voreva nò sonàla.

El nòmm Elio el vegn de la primma canzon del grupp (Elio), che la vegn citada a la fin del disch Esco Dal Mio Corpo E Ho Molta Paura (1993).

El ver nòmm de l'Elio l'è staa tegnuu nascòst per on mugg de temp: in occasion de concert ò intervist, l'Elio el s'inventava al moment di nòmm fals, cont el dì che eren ver, come "Roberto Moroni" ò "Roberto Gustavivi". In di agn '80 el se faseva ciamà di voeult anca Ielaio (la parnonzia inglesa di letter E, L, I, O), menter in del period dòpo el Festival de Sanrem del 1996 el s'era trovaa on nòmm anglòfon (come tutt el rest del grupp), var a dì Steve.

Oltra a la soa attivitaa de frontman del pròpri grupp, l'Elio l'ha participaa come musicista ò òspit a divers album de collega, traj quaj regordem el Claudio Bisio (Patè d'Animo, 1991), i Tenores de Neoneli, la Giorgia (Stonata, 2008) e 'l Graziano Romani (Tre Colori, 2007). El Graziano Romani, inscambi, in del 2002 l'ha cantaa C'è solo l'Inter, l'inn uffizial de l'Inter, scrivuu pròpri de l'Elio (che ghe sona la ghitara e 'l pianofòrt).

Come scrittor l'ha pubblicaa in del 2004 Fiabe Centimetropolitane e Animali Spiaccicati (insemma al Faso, al Rocco Tanica, al Cesareo e a la Chiara Rapaccini), e in del 2006, insemma al rest del grupp, la biografia (ò mej eterobiograifa, vist che l'è stada scrivuda anca de altra gent) Vite Bruciacchiate.

Come attor, l'ha participaa a on quaj de film (Rocco e le Storie Tese, Asini), ma soratutt a spettacoi teatrai, come l'Òpera de trii ghej del Bertold Brecht, Storia d'Amore e d'Anarchia de la Lina Wertmüller, Il Re Nudo del Luca Lombardi e alter anmò.

L'Elio (insemma al Faso) l'è staa vers la fin di agn '90 dobbiador del carton Beavis and Butt-head e poeu, in del 2004 del film Terkel in Trouble. Insemma al Faso l'è anca commentador di partid de baseball de la MLB per SKY Sport: de fatt i duu hinn appassionaa del quell gioeugh chì, tant che tucc e duu hann giugaa per agn in de la squadra milanesa Ares Milano Baseball (fondada a la fin di agn '80 pròpri del Faso): al dì d'incoeu el Faso l'è president de la squadra, l'Elio el vispresident.

In del 2009 (e poeu anca l'ann dòpo), l'Elio l'ha participaa a la seri còmica Drammi Medicali sul canal online FlopTv, insemma al Marcello Macchia (mej cognossuu come Maccio Capatonda), cont el fà el personagg del dottor Giolsot. Per evità de vedè mettuu el pròpri nòmm trai titoi de coa, l'Elio el s'è inventaa on alter nòmm: Julio Hammurabi.

In de l'estaa del 2010 l'è staa scernii per vess vun di quatter giudes de la noeuva edizion de X-Factor.