Elio e le Storie Tese

De Wikipedia
Va a: navegá, truvá
Vedrína
Vedrina
 Quest articol chì l'è assee ben faa Vedrina
Lumbard ucidental Quest articol chì l'è scritt in milanes, ortografia classega.
I Elio e le Storie Tese in del 2008

I Elio e le Storie Tese (o anca Elii; EelST) l'è on grupp musigal italian, nassuu a Milan in del 1980 a òpera del Stefano Belisari, ciamaa in arte pròppi Elio. El grupp l'è famos per i sò test surreai, umoristigh e a vòlt demenziai ma anca per el sò nivell musigal bell alt, senza cuntà la soa capacità de passà de on stil de musiga a l'alter senza problema. Quei capacità lì gh'hann daa a lor la possibilità de avèggh semper pussee sostenidor duranta la sua carrera, e anca de rivà a cantà al Festival de la Canzon Italiana del 1996, indove hinn rivaa segond.
Tucc i sò disch (ona desena) hinn staa premiaa cont el Disch d'Òr. El grupp, al dì d'incoeu, l'è faa sù de:

Del grupp fa anca part el Luca Mangoni (Milan, 26 marz 1961), ò domà Mangoni, che però el vegn ciamaa "artista a sé" (artista indeperlù) perchè 'l sòna minga (in realtà l'è on architett).

Bisògna infin regordà on component del grupp, el Feiez (Paolo Panigada, nassuu a Crema el 12 luj del 1962), polistrumentista (ma che 'l sonava soratutt el sax), mòrt per aneurisma el 23 dicember del 1998 duranta on concert.

L'Elio, el Rocco Tanica, el Cesareo, el Faso e 'l Mangoni a hinn anca i conduttor insema al Linus (del 1993) del programa radiofònigh Cordialmente.

Cuntegnüü

[Mudifega] Stòria

[Mudifega] I origin

L'origin effetiva del grupp l'è minga ciara, ma la gh'ha de vess pòsta tra el 1979 e 'l 1981[1].

La fondazion del grupp l'è fada risalì intorna al 1979-1980 al Licee Einstein de Milan, indove studiaven, in de l'istessa class, el Stefano Belisari, el Luca Mangoni e 'l Marco Conforti (fradell de Sergio e, al dì d'incoeu, manager del grupp). El primm concert offizial l'è staa faa in del luj del 1980 a la festa de la CAF San Siro e 'l pubbligh l'era faa de ona desena de pensionaa. El grupp l'era formaa de:

  • Stefano Belisari, a la vos e a la ghitara.
  • Pier Luigi Zuffellato a la batteria.
  • Paolo Cortellino al bass.


Duranta 'sto period l'è fada risalì anca la canzon Elio, de la qual el cantant el ciapparà 'l sò nòmm. In di ann successiv, el Cortellino l'è staa cambiaa cont el Fabio Gianvecchio (Chiosco) e poeu con Scaffale (a partì del 1984); e anca la batteria la gh'ha avuu on noeuv sonador, el Cosma (Roberto Sgorbati), che infin l'è staa sostituii, del 1982 al 1989, de la Drumulator del giovin Sergio Conforti, o Confo Tanica (domà pussee tard ciamaa Rocco Tanica), che 'l faseva anca el tasterista.

In del 1983 el ghitarrista el diventa el Davide Civaschi, ciamaa anca Cesareo (che 'l sonava giamò in del grupp giovenil di Urania), e inscì l'Elio l'ha poduu dedicàss soratutt al cantà. In quest period vegnen scrivuu canzon come Giorgio Légnami, Elio, Il Sciur Francesco, Catalogna, la magior part di quai la resta anmò al dì d'incoeu inedita.

In del 1985-1986 gh'è 'l cambi de bassista: de fatt, el Scaffale el vegn sostituii del Nicola Fasani, ò Pasto (domà dòpo on ann o duu Faso). El grupp el gh'aveva anca on sò presentador, Grussu (Pierino De Luca), che duranta el period 1986-1989 l'ha vestii anca el roeul de manager. I ann '80 veden el grupp esibìss in d'on mugg de locai còmigh milanes (compagn del Magia e poeu dòpo del Zelig) e de la Lombardia (compagn del Circolo della Pace e Fratellanza de Legnan). Di concert del temp hinn staa faa on fracch de registrazion pirata, che s'hinn spantegaa per tutt el Nòrd Italia, col fàggh conòss a on gran numer de bagai canzon come John Holmes, Cavo, Faro, Alfieri, Cara ti Amo, Tenia (cover de Maniac del Michael Sembello), La donna nuda (cover de I Want a New Drug del Huey Lewis), Silos, Urna, Cateto, Abbecedario, Pork & Cindy, Carro, Vivi Rocco, No Gianni No, The Peak of the Mountain e Piattaforma e fasend inscì la fortuna del grupp. Voeuna di registrazion pussee famos l'è quella del concert faa a Borbanee in del 1987 (Live in Borgomanero). In 'sto period incontren e diventen amis de tanta gent che poeu la saria vegnuda famosa: Claudio Bisio (che 'l fa on mucc de spettacol cont el Rocco Tanica), Antonio Albanese, Diego Abadantuomo, Gabriele Salvatores, Maurizio Milani, la Gialappa's Band, Aldo, Giovanni e Giacomo, Marina Massironi e tanti alter. Intant, on quai member del grupp (Elio e Cesareo) el lavora 'me impiegaa per tirà sù on quai danee, menter i alter ghe dann ona man a on fracch de alter artista italian 'me strumentista per i disch: el Rocco Tanica addirittura el vutta i Righeira a scriv la canzon L'Estate sta finendo e je compagna in del tour del 1986. On para d'ann dòpo el lavora anca con Massimo Ranieri, e per lù el sòna el piano in Perdere l'Amore.
El grupp el fa anca di ospitad in di programma de Italia1, var a dì Lupo Solitario (1987) e L'Araba Fenice (1988), anca se probabilment la soa prima apparizion in TV l'è del 1986, in occasion del Festival del Cabaret de Loano (Liguria). I Elio e le Storie Tese gh'hann anca l'occasion de registrà i canzon Abbecedario, Pork e Cindy e Silos in dò compilation de metà di ann '80 dedicaa aj noeuv grupp milanes.
In del 1988 el s'è giontaa al grupp anca el polistrumentista cremasch Paolo Panigada, ciamaa anca Mu Fogliasch (perchè el diseva de vess on Slav) ò Feiez. In de l'istess ann el produttor Claudio Dentes (soranomenaa del grupp Otar Bolivecic), dòpo d'avè sentii ona registrazion pirata d'on concert di Elio e le Storie Tese, j'ha contattaa, con la propòsta de fà sù on CD.

[Mudifega] I primm disch

In del 1989 a l'è sortii el primm disch del grupp: Elio Samaga Hukapan Kariyana Turu, che 'l contegniva on mucc de canzon scritt duranta tutt el desenni (ma soratutt in del period 1987-89) e che l'ha venduu pussee de centmila còpi, anca grazie ai bònn qualità musegai tiraa foeura del grupp. I Elio e le Storie Tese gh'aveven nananmò on batterista e donca in del CD aveven domandaa l'aiutt del todesch Curt Cress e in del tour quell de l'italo-svizzer Christian Meyer (ciamaa anca Bobo e giamò amis del Faso de on bell poo de temp), che on quai de ann pu tard el saria diventaa on member effettiv de la band.

L'ann dòpo l'è staa quell del famos filon musigal anti-Sanremo: el grupp l'ha creaa on mugg de cover umoristich (presentaa duranta el tour del 1990 o anca in programma come TAM TAM Village, sù RAI 1) de on quai de canzon che in quell'ann lì vegniven presentaa al Festival, trai quai regòrdom:

Tutt quest canzon, insemma magara a la canzon Arriva Clistere (cover de Arriva Cristina de la Cristina D'Avena) gh'avarissen avuu de vess mettuu in del sò noeuv album Tarati per la musica, ma i autor di test originai hann voruu minga dàggh el permess[7].

Ona sòrt compagna el ghe l'ha avuda el singol Sveliatevi! Born to be Abramo (e la soa segonda version: Saturday Night Strage), sia per i protest di Testimòni de Geova che per quei di autor olandes de Born to be Alive, canzon del Patrick Hernandez che l'era citada in del CD giamò a partì del titol (Born to be Abramo la sarà cantada in d'ona segonda version domà in del 1997, grazie a la participazion de l'Hernandez; el va però dii che tutt i canzon citaa hinn staa cantaa in di concert per on mucc de ann a vegnì).

El grupp alora l'ha pensaa de fà sù on mini-CD per Nadal, che 'l gh'avariss de vess on quaicòss de inascoltabil: The Los Sri Lanka Parakramabahu Brothers featuring Elio e le Storie Tese, faa in collaborazion con duu domestich filippin (i Parakramabahu Brothers) che mondaven el studi de registrazion. Ma la cà produttris l'ha voruu nò vendel come on mini-CD ma come album, e donca l'è inserii in de la discografia offizial. El 1990 l'è anca l'ann in del qual i Elio e le Storie Tese hann cantaa al Teatro dell'Elfo de Milan la canzon Ti Amo (con test improvvisaa al moment) per ben 12 or, fasend inscì on record[8]

El 1991 l'ha vist i Elio e le Storie Tese esibìss al Concert del Primm de Magg, indove hann cantaa ona version de Ti Amo dedicada a la corruzion de la class politega del temp (e fasend i nòmm, per esempi, del Giulio Andreotti, del Remo Gaspari, del Francesco Cossiga e del Giuseppe Ciarrapico) e per quest hinn staa censuraa in diretta de la RAI e casciaa via del palch. L'è stada l'unega esibizion del grupp per l'ann (la canzon la finirà, cont el nòmm de Sabbiature, in del CD Peerla). A bon cunt quell lì l'è staa l'ann del disch del Claudio Bisio (amis del grupp e present in bòna part di sò CD, a partì de Elio Samaga Hukapan Kariyana Turu) Paté d'Animo, del qual el Rocco Tanica l'è staa co-autor e che 'l ved anca la participazion de l'Elio e del Cesareo.

A bon cunt, ona quaj canzon del tour dell'Amore del 1990 l'ha poduu vedè l'onor de la pubblicazion in di ann successiv (Sono Felice; Gli Occhiali dell'Amore; Ameri).

[Mudifega] Ascensa mediatega

El 1992 l'è l'ann in del qual l'è sortii el disch Italyan, Rum Casusu Çikti (che 'l contegniva soratutt di inedit, oltra a on quai canzon di temp andaa), che l'ha vist la partecipazion de cantant come l'Enrico Ruggeri e 'l Riccardo Fogli. El disch e i singoi Pippero e Servi della Gleba hinn staa on grandissim success. In del 1992 l'è entraa stabilment in de la formazion l'architett Luca Mangoni, giamò compagn de scoeula de l'Elio, con la funzion de rappresentà in di concert, cont el ballà e, di vòlt, cantà, i vari personagg nassuu de la fantasia del grupp (Supergiovane, i quatter vitej de Il Vitello dai piedi di balsa, l'agent segret bulgher del Pippero...). Semper el 1992 l'ha viduu el grupp rennovà el sodalizi con la Gialappa's Band, per la qual l'ha faa i sighel del sò programma Mai Dire Gol (al qual hann despess partecipaa) del 1992 al 1997. I canzon eren:

  • Mai Dire Gol 1992/93: Amico Uligano
  • Mai Dire Gol 1993/94: Sunset Boulevard
  • Mai Dire Mondiali 1994: Nessuno allo Stadio
  • Mai Dire Gol 1994/95: La cinica lotteria dei rigori
  • Mai Dire Gol 1995/96: Il concetto di banana
  • Mai Dire Gol 1996/97: Balla coi barlafüs

In del 1993, sòtta i domand di fan de veggia data, el grupp l'ha faa sù on noeuv CD, Esco Dal Mio Corpo E Ho Molta Paura (del nòmm de vun di sò vegg manifest per i concert) in del qual hinn staa registraa on mucc di vegg canzon di agn '80 (Catalogna, Abbecedario, You, La Saga di Addolorato) pù ona quai de canzon pussee recent (Sono Felice, Amico Uligano) e anca ona noeuva (Gomito a gomito con l'aborto). El disch l'eva segutaa de on singol, Aborto/In te (1994), che 'l contegniva ona cover de la canzon In te del Nek cantada del Mangoni. E l'è staa in del 1993 che i Elio e le Storie Tese in compagnia del Linus hann comenzaa su Radio Deejay el programma Pista di Lancio (al dì d'incoeu Cordialmente). In del 1993 l'è sortida anca la cassetta Chi ha incastrato Elio e le Storie Tese?, ona sòrta de prima autobiografia romanzada del grupp, cont intervist e registrazion de vegg concert.

Per Radio Deejay, in del 1995 el grupp l'ha faa ona canzon de Natal ciamada Christmas with the yours, cantada insemma al Graziano Romani. Quella de fà canzon natalizzi per la radio l'è diventada ona tradizion in di agn. In del 1994 l'è mòrta de cancher la Paola Tovaglia, che cont el nòmm de Peev Agliato l'aveva participaa al disch Elio Samaga Hukapan Kariyana Turu.

[Mudifega] El success

El Rocco Tanica

In del 1996, i Elio e le Storie Tese hann tòlt part al Festival de la Canzon Italiana quell de quarantases a Sanremo. Per l'occasion hann portaa la canzon La Terra dei Cachi, che la parlava di problema de corruzion, mafia e sanità present in Italia. La canzon, giamò pòcch compagna de quei canònigh de Sanremo, l'è stada compagnada de performances bizzarr e particolar:

  • Duranta la primma esbizion, l'Elio el gh'aveva ona perucca negra e on maglion bloeu. A on cert pont, l'ha tiraa foeura de quest on brasc, e donca tucc hann capii che l'aveva cantaa per metà de la canzon cont ona man finta. La man l'è stada subit ciamada "Mano Pulita" (man nettada, per assonanza con la famosa indagin de Mani Pulite, duranta la qual eren staa scoprii gravi stori de corruzion in del mond de la politiga taliana).
  • La segonda esibizion, a causa del regolament del Festival de quell ann, la gh'aveva de vess de domà 55 segond, e per quest tucc i cantant ghe cantaven la part che per lor a l'era la pussee importanta de la sò canzon. I Elio e le Storie Tese hann donca cantaa quasi tutta la canzon, cont el raddobbià el temp de la musiga (varda el video).
  • L'ultima esibizion l'ha vist el grupp truccaa d'argent, in onor del grupp frances di Rockets. Tra l'alter, se el rest del grupp l'aveva domà la fascia truccada e ona cuffia, l'Elio inveci el s'era rasaa i cavei per podè pitturàss pròppi tutta la testa (inscì l'è spiegaa el motiv de la perucca del primm dì; varda el video).

Per quest motiv el grupp e la sò canzon gh'hann avuu on grand success de pubbligh, duranta el Festival. E somigliava che gh'avarissen de vingg la competizion, ma la giuria l'ha faa avègh la vittòria a la canzon de Ron e Tosca Vorrei incontrarti fra cent'anni. El grupp el gh'ha avuu, a bon cunt, el segond pòst, el premi de la critega Mia Martini e la fama de vincitor moral del festival, fama accreditada di vos che parlaven d'on intervent del Pippo Baudo (el presentador e direttor artistich del programma) per evità de fài vingel [9]. A bon cunt, la participazion al festival l'ha consacraa la band milanes, che per el sò disch noeuv, Eat the Phikis (che 'l contegn i participazion de la Giorgia, de l'Edoardo Vianello, de l'Enrico Ruggeri e del James Taylor), l'ha vingiuu el Disch de Platin. Trai avveniment de l'ann, hinn famos la participazion al Concert del Primm de Magg a Roma (duranta la qual hann saludaa el pubblich con La società dei magnaccioni) e 'l fatt che l'è succeduu al Festivalbar: con l'avègh de cantà la canzon Mio Cuggino in playback, hann faa de tutt per fàll capì, cont el sbajà appòsta i paròll e 'l labial.

I ann successiv hann viduu i Elio e le Storie Tese concetràss principalment aj concert, anca se la mancava nò la produzion discografega: in del 1997 hinn sortii Del Meglio Del Nostro Meglio Vol. 1 (primma raccòlta di sò maggior success, che l'ha segnaa anca la pas tra 'l grupp e 'l Patrick Hernandez, dòpo de l'episòdi del singol Sveliatevi! Born to be Abramo) e E.L.I.O. (disch con version in ingles e spagnoeu de on quaj de sò canzon, faa in occasion del mini-tour in di Statt Unii de l'ann dòpo). Tra l'alter, el 1997 l'è anca l'ann de Rocco e le Storie Tese, film pòrno del famos pornoattor Rocco Siffredi con la participazion (domà recitada, senza el coinvolgiment in scen hard, ovviament) che l'è diventaa on film cult del gener [10].

In del 1998 inveci l'è staa el turn de Peerla, altra raccòlta de inedit e raritaa (soratutt i sighel de Mai Dire Gol, ma anca vegg cover del 1990, ona noeuva version de Urna e anmò alter canzon del period di agn '80). De l'annada 1998 l'è de regordà la version de Ti Amo (ciamada Ti Amo Campionato) cantada e sonada de l'Elio e del Rocco Tanica a l'ultima pontada de Mai Dire Gol 1998 sora i comportament di arbiter a favor de la Juventus duranta el Campionaa, divegnuda quas profetega in seguit al scandal de "Calciopoli" del 2006[11] (chì el video de l'esibizion). Ma el 23 dicember 1998 el Feiez, menter l'era dree a sonà in d'on concert de la Biba Band, l'è mòrt per on aneurisma celebral.

[Mudifega] De la mòrt del Feiez a Cicciput

El Faso

La mòrt del Paolo Panigada l'ha segnaa on pont de svòlta per la carrera del grupp: per i mes e agn a vegnì, i Elio e le Storie Tese hann deminuii drastigament i sò apparizion televisiv e la produzion artistega, e anca l'arriv de on noeuv member in de la formazion (l'Antonello Aguzzi, ciamaa Jantoman) l'ha minga voruu significà ona sostituzion del pòlistrumentista cremasch, in quant el Jantoman el sòna nò el sax ma i taster elettrònich, soratutt duranta i concert. A bon cunt, in del 1999, i Elio e le Storie Tese hann faa sortì duu noeuv CD: el primm, Craccracricreccr, l'è staa asse manch brillant di quij precedent, anca se i canzon La Visione e Discomusic gh'hann avuu on grand success de pubblich (Discomusic l'è andada al Festivalbar, indove per la segonda voeulta el grupp l'ha faa de tutt per fà capì che eren dree a cantà in playback: de fatt, menter la musega e la vôs andaven, lor eren mut e immòbil); el segond, Tutti gli Uomini del Deficiente, colònna sonòra de l'omònim film de la Gialappa's Band, el contegniva, oltra a bran strumentai, anca canzon inedit e de veggia origin (Yes I Love You, Risate a Denti Stretti) e participazion del Lucio Dalla (Psichedelia) e de la Raffaella Carrà (Presidance). Semper in quell agn lì hann vingiuu a Dublin on premi di European Music Awards de MTV, quell de Best Italian Act. In quell'occasion, i Elio e le Storie Tese hann voruu mostrà tucc i stereòtip sora i italian: l'Elio, sul palch, l'ha dii nanca ona paròlla in Ingles, menter i alter member del grupp faseven finta de vess nò interessaa a quell che l'era dree de succed.

Del 2000 inveci l'è el famos concert de Lugan al qual hann participaa anca l'Oliver Skardy, el Riccardo Fogli e l'Ike Willis, cantant e ghitarista in d'on mugg de canzon del Frank Zappa, musicista american al qual i Elio e le Storie Tese hann semper dii de vesses ispiraa (tra l'alter, el concert l'è staa registraa de la RTSI). In del 2000, in occasion di Campionaa Europee de Folber, i Elio e le Storie Tese hann faa la canzon La gente vuole il Gol, su la musega de Ùnanimi. El 2001 l'è staa l'ann de Made in Japan - Live at Parco Capello, el primm CD live del grupp, con registrazion di concert tra l'ann 1996 e 'l 1999 (donca quand el Feiez a l'era anmò viv). In quell ann lì l'è staa trasmettuu su RAI2 (vers i duu de nòtt, senza varguna campagna pubblicitaria) Vite Bruciacchiate, seri televisiva in quatter pontad fada di Elii duranta el sò tour in America, che la cuntava la participazion de l'Enzo Arbore.

Per vedè on noeuv album in studi el s'è dovuu spettà el 2003, quand el grupp l'ha faa sortì Cicciput, che 'l retornava al stil e aj tematich di disch pussee vegg che el gh'aveva i ospitad del Max Pezzali (Shpalman), de l'Enrico Ruggeri (Gimmi I., Pagàno, Cani e padroni di cani), de l'Ike Willis (Gimmi I.), del Maurizio Crozza (Shpalman, Pagàno), del Claudio Bisio (Gimmi I.) e del Gianni Morandi (Fossi figo). In particolar, el gh'ha avuu on grand success el singol Shpalman, in de la version cantada domà del Rocco Tanica (al contari de la version del CD, che l'eva on duett cont el Max Pezzali). El video de questa canzon (che 'l gh'ha come protagonista el Mangoni) l'ha vingiuu el premi de Miglior videoclip italiano.

Bisògna anca regordà che tra la fin di ann '90 e l'inizzi del millenni noeuv (soratutt el period 1999-2001), i Elio e le Storie Tese hann despess partecipaa 'me musicista a la trasmission Mai Dire Gol e Mai Dire Maik de la Gialappa's Band. In quei occasion chì hann despess cantaa canzon del sò repertòri ma anca ròbb de alter, despess in compagnia del Fabio De Luigi ò de la Paola Cortellesi.

[Mudifega] La noeuva stagion "live"

In del 2004 l'è nassuda l'idea de vend a la fin di concert on CD con la registrazion de la primma ora de l'istess (i CD brulé [12]). Semper in quell'ann l'è nassuda anca la Hukapan, la cà discografega de proprietaa del grupp, che l'era in polemega con la politega de la sò veggia cà. De quest iniziativ l'è vegnuu foeura Ho Fatto Due Etti E Mezzo, Lascio?, la tracklist di CD brulé del tour 2004, segutada de Il Meglio di Ho Fatto Due Etti e Mezzo, Lascio? che 'l contegniva el mej di registrazion. L'idea la va innanz anca adess (2005: Grazie per la splendida serata; 2006: Coèsi se vi pare; 2006: Qualità Oro; 2008: Supermassiccio). In del 2004 l'è staa publicaa anca el singol Oratorium, dedicaa a la vita in di oratòri cattòlich. A partì del 2005, cont el concert de Castellazz de Bollaa, a Villa Arconaa, la nass anca l'idea di DVD brulé.

El tour del 2006 el s'è ciamaa Coèsi se vi pare: insemma a lor el participava anca l'amis de veggia data Claudio Bisio, e 'l spettacol el contegniva canzon sia del grupp che del còmich. Del concert de Mantova l'è staa faa on DVD, e 'l filmaa l'è staa despess trasmettuu su SKY (canai Jimmy e Comedy Central). In del 2006 l'è sortii anca l'autobiografia del grupp, Vite Bruciacchiate - Ricordi confusi di una carriera discutibile, che 'l cuntava anca di intervent de amis e collega musegaj.

Duranta el tour del 2007, Emozioni Fortissime, hinn staa presentaa di canzon del sò futur CD (Parco Sempione, Indiani, La Lega dell'Amore). A causa di laorà per el noeuv album, el Rocco Tanica l'è restaa a Milan (minga semper, però) e 'l sò ròl l'è staa ciappaa de on alter vegg amis del grupp, el Vittorio Cosma, soranomenaa per l'occasion Clayderman Viganò.

[Mudifega] El bienni 2008-2009

Infin, dòpo cinch ann, in del genar del 2008 l'è sortii Studentessi, segutaa di singoj Parco Sempione e Ignudi fra i nudisti (quest chì duranta l'estat). In particolar, la canzon Parco Sempione (el qual video l'è staa premiaa come Miglior videoclip de l'ann) l'è stada on grand success e, come tucc i success, la gh'ha avuu di critich per come l'aveva parlaa de la Gionta de la region Lombardia, accusada de avè fà tajà el Bosco di Gioia (on'area verda de Milàn) per fàgh sù di pròpri edifizzi, contra el vorè de 16.000 persònn (traj quaj gh'era anca el Rocco Tanica) che s'eren oppos a questa iniziativa.

Duranta el Festival de Sanrem, i Elio e le Storie Tese hann presentaa el DopoFestival, in del qual, come desdòtt ann primma, hann creaa di cover di canzon presentaa duranta la competizion. Traj canzon "revisitaa" se pòden cuntà:

El Cesareo

El DopoFestival l'è stada ona sòrta de reappacifigazion tra el grupp e 'l Pippo Baudo dòpo i avveniment del 1996. El presentador, òspit del programma, l'ha lodaa la qualitaa de la trasmission e la conduzion di Elii, che, per lù, eren riessii a fà on programma intelligent e spiritos senza cadè in volgaritaa ò ròbb simel (e gh'è anca de dì che per tutta la durada del DopoFestival el grupp l'ha voruu minga fà pubblicitaa a Studentessi, che 'l sortiva duranta quell period). A l'ultima pontada del Festival, i Elio e le Storie Tese hann cantaa foeura concors Largo al Factotum (aria ciappada de El Barbee se Sevija del Gioacchino Rossini), definida di giornai vuna di esibizion pussee applaudii de la serada. A la fin de l'esibizion, sonada con perucch e vestii del '700, l'Elio l'ha dedicaa la canzon al Feiez, cont el regordà che anca lù l'era staa sul palch del Teater Ariston on quaj de ann primma (varda el video de l'esibizion). El DopoFestival l'è staa nomenaa vun di des programma miglior de l'ann 2007/2008.

Al concert del Primm de Magg, i Elii hann cantaa tré canzon: Gargaroz, Parco Sempione e ona version de Largo al Factotum dedicada, come desvòtt agn primma, al Ciarrapico, che l'era staa eleggiuu in Parlament cont el Pòpol de la Libertà in seguit ai elezion del 2008.

El tour del 2008 (Supermassiccio tour) l'è staa dedicaa a la promozion del noeuv album (Supermassicio l'è el nòmm de vuna di canzon de Studentessi), e l'ha vist la participazion come corista de la Paola Folli. In del december del 2008 l'è staa faa a Crema on concert in onor del Feiez, mòrt des ann primma, ciamaa Panino Day, che el gh'ha avuu on grand numer de òspit. Semper in december, i Elio e le Storie Tese hann refudaa l'Ambrosin d'Òr per protesta contra el comun de Milàn, che l'aveva negaa l'onorificenza al giornalista Enzo Biagi e la cittadinanza onoraria al Roberto Saviano, autor del liber Gomorra.

In del 2009, in occasion del LXI Festival de Sanrem, s'hinn propòst anmò come possibil conduttor del DopoFestival, còssa che hann poduu minga fà a causa de l'eliminazion de quell a òpera del noeuv conduttor e direttor artistich de la kermesse, el Paolo Bonolis. In compens, el 13 fevree (duranta la trasmission Parla con Me su RAI3) e hann faa i sò interpretazion di canzon che sarien staa cantaa duranta el Festival (còssa ovviament assurda, vist che primma del Festival nissun el pò savè come sien i canzon presentaa; e de fatt l'era ciar l'intent umoristich e parodistich de l'esibizion).[13] Duu mes pussee tard, el 19 april, hinn andaa a la pontada final del talent-show X-Factor (su RAI1), indove hann faa on duetto con vun di finalista, i The Bastard Sons of Dioniso, cont i quaj hann cantaa Uomini col Borsello (canzon che la se troeuva in Italyan, Rum Casusu Çikty).

In occasion del terremòtt in Abruzz de l'april 2009 i Elio e le Storie Tese hann participaa al progett Artisti Uniti per l'Abruzzo (Artista Unii per l'Abruzz), cont el cantà la canzon de beneficenza Domani 21/04.2009 insemma a alter 55 cantant italian.
In de l'autunn 2009 hann faa la sigla del programma radiofònich de l'amis Linus Deejay Chiama Italia. Duranta l'ann hann participaa a la trasmission Parla con Me, su RAI3, come band de compagnament del programma. In quella occasion chì, oltra a introdù con jingle musicai i personagg invitaa al programma, hann cantaa di canzon del sò repertòri e n'hann compòsta ona quajvoeuna sora vari aspett de la vita politiga italiana [14] [15] [16][17][18].

In occasion different in del 2009, on quaj member del grupp l'ha diciaraa l'intenzion de fà per quell ann chì on disch celebrativ per i vint ann de la sortida de Elio Samaga Hukapan Kariyana Turu [19] [20] [21] [22]. A l'è fòrsi anca per quella reson chì che 'l grupp l'ha faa, duranta l'estaa 2009, domà on concert [23].

El 2 ottober l'è sortii el primm singol del disch noeuv, Storia di un bellimbusto, che l'è staa trasmettuu in anterprima su Radio Deejay el mattin del dì prima.
Semper in merit di celebrazion per i vint ann de la sortida de Elio Samaga Hukapan Kariyana Turu, el 26 ottober 2009 i Elio e le Storie Tese hann faa on concert celebrativ (oltra a vess ona sòrta de anteprima de Gattini) al teater Arcimboldi de Milan, con la participazion de 48 musicista de la Filarmonica Arturo Toscanini. Per el sò caratter unich, l'è staa anca trasmettuu in diretta de SKY Primafila, prima voeulta in Italia per la stòria de quella television satellitar chì[24][25].

On quai de dì dòpo, el 30 ottober, l'è finalment sortii el disch noeuv, Gattini. In occasion de la sortida del CD (ona riproposizion cont orchestra de ona quindesena de success de la stòria discografiga del grupp), i Elii hinn andaa despess in television per presentàll. In particolar, hinn andaa a la semifinal de X-Factor e a Quelli che il Calcio, indove hann cantaa Storia di un bellimbusto. Per la prima occasion, s'hinn presentaa vestii come i Village People, per la segonda (cont el regordà la perfomance che 'l grupp ingles di Muse l'aveva faa on quaj mes prima pròppi in del programma condòtt de la Simona Ventura), vist che cantaven e sonaven in playback s'hinn scambiaa i ròl (Christian Meyer a la vos, Faso a la batteria, Cesareo al bass, Elio al pianofòrt e Rocco Tanica a la ghitara).

[Mudifega] Al dì d'incoeu

El 17 genar 2010 l'è partii a Vicenza el noeuv tour teatral, spartii in duu tòcch: Bellimbusti in Tour (inverna-primavera) e Bellimbusti Balneari (estaa-autunn). L'ultimm concert del tour l'è staa faa a Milan el 12 november 2010, in occasion de on event de beneificenza per Telethon.

Dòpo el Festival de Sanrem del 2010 el grupp l'ha compòst di revisitazion de dò canzon che hann partecipaa a la kermesse: Italia Amore Mio, cantada del princip ereditari italian Emanuel Filibert de Savòia, del cantant Pupo e del tenor Luca Canonici (segonda classificada); e Tutte le volte che, la canzon che l'ha vingiuu el Festival e che l'è stada cantada del Valerio Scanu (el qual l'ha ditt che a lù la parodia la gh'è piasuda [26]). Anca quella vòlta chì i parodii hinn staa presentaa a Parla con Me e gh'hann avuu ona granda diffusion in su la red[27][28].

El 25 marz 2010 hinn staa trai òspit numeros de la trasmission-manifestazion Raiperunanotte, condòtta del Michele Santoro in favor de la libertà de stampa, danneggiada, segond lù, de la politiga del primm minister Silvio Berlusconi.


In de l'estaa del 2010, l'Elio l'è staa scernii per vess vun di quatter giudes (insema a l'Enrico Ruggeri, la Mara Maionchi e l'Anna Tatangelo) de la noeuva edizion de X-Factor, notizzia che però l'era dree a 'ndà in gir giamò de on quai mes.
Come giudes, l'Elio el gh'ha avuu ona popolarità granda e l'è riessii a portà a la pontada final del programma (23 november 2010) duu di trii cantant de la soa sqaudra, vun di quai, la Nathalie Giannitrapani, l'ha anca vingiuu, menter l'alter, el Nevruz Joku, l'è rivaa terz.

Insema a l'attività de giudes per X-Factor, el cantant l'ha segutaa a collaborà col grupp: la canzon Bunga Bunga compòsta a Parla con Me (a ottober) in occasion del noeuv scandal sessual ligaa a Berlusconi l'è diventaa on noeuv tormenton de la red, anca foeura de l'Italia. [29]. Semper in del mes de november hann tòlt part a l'ultima pontada del programma Vieni via con me, condòtt del Fabio Fazio e del Roberto Saviano: chichinscì hann cantaa La Terra dei Cachi.

In del genar 2011 el sitt Rockol cont on sondagg j'ha nominaa i artista italian pussee important del desenni 2001-2010[30].

Semper a cavall tra el 2010 e 'l 2011, la Gazzetta dello Sport l'ha promòss ona distribuzion de asquas tutta la discografia del grupp, pù duu DVD de duu concert: quell de Lugan del 2000 e quell de Piangipane (Ravenna) del 2010.
In del 2011 hann cantaa Pensiero Stupesce, canzon che la se troeuva in di titol de cova del film Boris (sortii el 1 de april).
In occasion di elezion amministrativ milanes, el Mangoni el s'è candidaa con la lista de la Milly Moratti a sostegn del candidaa del centro-sinistra Giuliano Pisapia. El grupp l'ha sostegnuu attivament, tanto che poeu el Mangoni l'ha ciappaa addirittura 1068 preferenz.
La campagna politiga a sostegn de Pisapia l'è andada innanz anca per i quindes dì prima del ballottagg, tanto che 'l venerdì 27 de magg hann cantaa al concert in piazza del Dòmm che 'l metteva fin a l'istessa campagna. In del magg 2011 el ven foeura el film Paul, indove l'Elio el dobbia el protagonista, che l'è on marzian. In occasion di intervist faa in del period in del qual el film l'è sortii al cinema, l'Elio l'ha dii che ghe sarà probabilment on noeuv disch in del 2012 [31]. El 20 de ottober el ven foeura la quinta stagion de X-Factor (quella vòlta chì in sù SKY Uno, condòtt de Alessandro Cattelan), indove a troeuvom anmò l'Elio 'me giudes, 'sta vòlta insemma al Morgan, a la Simona Ventura e a l'Arisa. Anca in 'sta occasion l'è riessii a portà vun di sò protett in final (5 de genar del 2012), cioè 'l grupp turines de I Moderni (lù el gh'eva la categoria di Grupp vocai), che poeu hinn rivaa segond denanz a la Francesca Michielin. Per quest l'è staa confermaa anca per l'edizion che la vegnarà. A X-Factor ghe toveven part anca la Paola Folli ('me vocal coach de la squadra de la Simona Ventura, cioè la categoria di tosanett sòtta i 24 agn) e 'l Rocco Tanica ('me "opinionista" per el Xtra Factor, che l'era el moment di comment dòpo de la trasmission).

El 14 de genar del 2012 el scomincia in sù La7 el noeuv programma de la Serena Dandini (che l'eva desmettuu de lavorà con la RAI) The show must go off, al qual toeuven part, come grupp de compagnament, anca i Elio e le Storie Tese: la primma pontada però l'è stada spostada a la settimana dopo, perchè quei de LA7 hann voruu fà ona pontada special del telegiornal per parlà de ona nav de crociera che l'era fondada la nott prima in Toscana. Quand che l'è partida la primma pontada (ona settemana dòpo) hann faa de l'ironia sora 'sta storia de la nav e del pòcch coragg demostraa del sò capitan Francesco Schettino col cantà on refasiment de Onda su onda de Paolo Conte, anca se inscì s'hinn portaa 'dòss ona quai polemiga.

El 24 de genar hann faa la primma proeuva del sò noeuv tour denanz a domà ona trentena de member del sò fan club e poeu el dì dopo hann scominciaa la tournée teatral (Enlarge your penis tour), in de la qual hann presentaa dò canzon noeuv (voeuna di quai la se ciama pròppi Enlarge your penis[32]). Per 'sta reson lassen perd per on poo la collaborazion con la Dandini, già che gh'hann de andà in d'on fracch de sitt different per fà i concert e poden nò stà semper a Roma a registrà el programma. In quei occasion chì el salta foeura la notizzia che in de l'autunn del 2012 el sortirà el noeuv album, dopo quattr'ann de Studentessi [33] [34] .

In del genar del 2012 l'è anca sortida ona classifiga de la version italiana de Rolling Stone (voeuna di revist musicai pussee important al mond), che l'ha votaa Elio Samaga Hukapan Kariyana Turu el disco quell de quindes pussee important de la storia de la musiga italiana [35].

[Mudifega] Alter progett

Gh'è inoltra de regordà i progett parallel sviluppaa de on quaj member del grupp in 'sti ultim ann:

[Mudifega] El stil

I Elio e le Storie Tese hinn staa despess definii come musicista de rock demenzial. Ma a lor la ghe pias nò questa definizion, perchè voeuren evità de vess accomunaa a grupp come i Brutos, i Skiantos ò i Gem Boy. L'è vera che se de ona part (soratutt aj origin) el grupp el s'è ispiraa al stil "demenzial", per modalitaa de umorismo e concert, de l'altra el s'è impegnaa a desviluppà ona qualitaa de musega assee elevada, e ona capacitaa de passà senza tròpp problemma a qualsessia stil, del rock (John Holmes, Yes I Love You, Essere Donna Oggi) al blues (La Saga di Addolorato, Puliletti Blues), del metal ò hard-rock (Urna, Omossessualità) al country (Indiani), del reggae (Abbecedario) a la disco (Born to be Abramo, Discomusic, Pippero, La Chanson), del folk (Zelig: la cunesiùn del pulpacc) a la musega latina (El Pube).
Hinn capazz de fà canzon con domà tòcch de alter musich (Indiani; Born to be Abramo), ò anca cont el sonà al contrari i laorà de alter artista (Ignudi fra i nudisti l'è Suspicious Mind de l'Elvis Presley al contrari).

Per i sò capacitaa musegaj, i vari member del grupp hinn staa despess ciamaa a sonà in disch de alter cantant, traj quaj se pòden regordà el Roberto Vecchioni, el Daniele Silvestri, el Fabrizio De André, la Mina, i Righeira e i Ricchi e Poveri. Inscambi, on mugg de artista e musicista hann voruu participà come òspit in di sò disch: Pierangelo Bertoli, Riccardo Fogli, Claudio Baglioni e l'Enrico Ruggeri traj pussee famos.

A causa de quest messagg musegal originari, gh'è chi el voeur vedèi come member de on grupp de rock progressiv a tucc i effett. L'è minga on misteri però che i Elio e le Storie Tese se sien semper ispiraa, sia per la commistion di gener, sia per el sò surrealism, al musicista american Frank Zappa (1940-1993), anca se hann despess hann deciaraa de vorè creà on quajcòss de noeuv e original, per podè ciappaa l'interess di ascoltador.

I Elio e le Storie Tese disen anca de avè inventaa on noeuv gener musegal, el gezz che, a differenza del jazz, l'improvvisa nò sora on tema musegal ma sora on argoment: canzon gezz hinn La Saga di Addolorato ma soratutt L'Indianata, che la cambia paròll a ògni esibizion (la canzon l'è cognossuda anca come Casalinga Alcolizzata, a causa de l'argoment fiss sora el qual la vegn fada l'improvvisazion).

Inoltra el grupp l'è famos per la soa abitudin de canzon ò girà di video a l'invers.

[Mudifega] I concert

L'Elio duranta el sòna la ghitara in Tapparella

Voeuna di bas del success di Elio e le Storie Tese l'è staa el numer semper cressent de fans che l'è andaa aj sò concert dòpo de avè scoltaa ona registrazion pirata. Per quest, quand che hinn minga dree de preparà on disch, i Elii hinn semper in tournée. El rappòrt cont i fans l'ha permiss l'ha faa inscì che se sien creaa di moment quas rituaj, che vegnen ripetuu in tucc i concert, e che veden la participazion anca di quij fans pussee sfegataa.

Per esempi, on moment tipich del concert el se presenta quand el riva el Mangoni in sul palch: el pubbluch el se mett ad applaudìll, come se 'l fuss lù el protagonista del concert, e minga el grupp. A 'sto pont, l'Elio el fingg de vess inrabii cont el pubblich: di voeult el dis che 'l voeur andà via del concert per vedè quant hinn quij che hinn vegnuu là per scoltàll e quant inveci hinn lì per el Mangoni.

On moment tipich inveci di concert di agn '80 l'è quell che 'l gh'eva primma de la canzon Vivi, vivi Rocco: el Rocco Tanica el fingeva de avè sbajaa a sonà ona nòta, e per la disperazion el voreva massàss. Allora el rest del grupp el scomenzava a sonà la canzon (parodia de We will rock you di Queen) per cercà de fàll rid, còssa che la succedeva semper. A 'sto pont, el concert l'andava innanz (varda chì; on'altra variant la vedeva el Rocco Tanica che 'l fingeva de avègh on infart; el vegniva reanimaa ma lù el diseva de vorè morì perchè menter l'era dree de passà a mejor vida l'aveva vist ona lus bianca, e là gh'eren tucc i sò vegg parent mòrt e donca voreva 'ndà con lor; a 'sto pont la partiva la canzon, come se pò vedè chì).

Duranta la canzon Cara ti amo gh'è la fras Non è vero, tu non capisci l'universo femminile ("L'è minga ver, ti te capisset nò l'univers femminin"): in tucc i concert la paròlla Non la vegn prolungada per on quaj de mignuu. Istess l'avvegn con Alfieri (la fras l'è: trae dall'Uomo del Giappooooooooone, var a dì el trà de l'Òmm del Giappoooooooooon). Semper in Alfieri, quand gh'è la stròfa del Cesareo, l'Elio e 'l Faso proeuven in tutt i maner de fàll rid, e despess ghe riessen (hinn puu i vòlt in di quaj quest obbiettiv el vegn conseguii che quij on di quaj el Cesareo el riess a restà impassibil, ò almanch a finì de cantà el pròpri tòcch de canzon). In del CD Del Meglio Del Nostro Meglio Vol. 1, indove gh'è la version offizial de Alfieri, senza el test vesin se pò minga capì come la sia la stròfa del "pòver" ghitarista, vist quant el rid.
In del tour del 1988 i Elio e le Storie Tese hann presentaa on'altra version de Alfieri (ciamada Alfieri 2) a la fin de la qual el gh'era on longh assolo de ghitara sora i nòt de Out in the daylight del Mike Rutherford. A la fin de l'ann, con l'entrada del Feiez in del grupp, Alfieri a l'è stada presentada in d'ona ulterior version, in de la qual el pòlistrumentista cremasch el cominciava la soa stròfa ma el vegniva interrompuu di insult del rest del grupp.

In Oratorium, la maggior part di member del grupp el cambia el pròpri strument musegal (el Faso a la batteria, el Christian Meyer al bass, el Rocco Tanica a la ghitara, per esempi; e gh'è el Mangoni vestii come on bagaj, cont on berrettin roeusa mettuu a l'invers e i pantaloni cont i bretell giald, che 'l giuga cont ona balla).

In del tour del 1987, l'Elio, a linizzi di concert, el diseva che 'l sò grup a l'era lì per sostistuì i Elio e le Storie Tese, e che in realtà lor eren on grupp de musega greca (e lù donca a l'era Elios, el pianista Roccos eccetera).
Duranta el tour del 2000 i concert eren caratterizzaa de duu medley: el primm, a l'inizzi de l'esibizion, el cominciava con Out in the daylight e 'l segutava cont tòcch de canzon del repertòri pussee recent del grupp (Balla con i barlafüs, Tonza patonza, Help me, L'astronauta pasticcione). El segond, che l'era staa giamò propòst duranta i tour del 1987 e del 1990, el se ciamava Perdo anche l'ultimo dente e cerco di riavvitarlo e 'l contegniva on mucc de canzon che eren ann che i Elio e le Storie Tese je sonaven minga (compagn de El Sciur Francesco, Abbecedario e Settore Giovanile Targato Travagliato) insemma a canzon pussee recent (Presidance, La Terra dei Cachi) e a canzon e musegh de alter artista (el Te Deum, Radio GaGa di Queen). I Elii cont el scherzà diseven de vesses ispiraa, per quell medley chì, a quell che aveven faa i Pooh per el sò anniversari quell de vintcinch.
La tradizion di medley a l'è segutada in di ann dòpo: duranta i tour de 2007 e del 2008 a l'è staa presentaa on medley de tutt i canzon disco del grupp (in ordin: Pippero, La Chanson, Discomusic, Born to be Abramo).

In Servi della Gleba, la telefonada final la fa el bassista Faso: menter l'è dree a telefonà el bass l'è sonaa de l'Elio (prima del Feiez)
Duranta la canzon Tapparella (sonada de sòlit vers la fin del concert), el ritornell final (Forza Panino) l'è dedicaa al Feiez: tutt el pubblich el se mett a cantà Forza Panino e a batt i man a temp. Duranta l'esecuzion, anca l'Elio el sòna ona ghitara.

[Mudifega] Formazion

[Mudifega] Nucli stòrigh

  • Elio, vos (1980 - incoeu), ghitarra (1980-84);
  • Rocco Tanica, pianòla (1982 - incoeu) e batteria elettròniga (1984/85-1989/90);
  • Cesareo, ghitarra (1984 - incoeu);
  • Faso, bass (1985 - incoeu);

[Mudifega] I alter member

  • Christian Meyer, batteria (1989/90 - incoeu);
  • Mangoni, artista a sé (1992 - incoeu);
  • Jantoman, taster elettrònigh (1999 - incoeu);

[Mudifega] Vegg member del grupp

  • Pierluigi "Usna-Cata" Zuffellato, batteria (1980- 84?);
  • Paolo Cortellino, bass (? 1980)
  • Fabio "Chiosco" Gianvecchio, bass (1980-1984);
  • Dario "Piorrea/Piorra/Scaffale" Mazzoli, bass (1984-1985);
  • Roberto "Cosma" Sgorbati, batteria (1984/85);
  • Feiez, sassòfon (1988-1998);

[Mudifega] Collaborador

[Mudifega] Discografia e videografia

[Mudifega] Album

[Mudifega] Album in studi

[Mudifega] Raccolt

[Mudifega] Album live

[Mudifega] Colonn sonori

[Mudifega] Compilation e cofenett

[Mudifega] Singol

[Mudifega] CD brulé

[Mudifega] Colònn sonòri

[Mudifega] Canzon de Nadal per Radio Deejay

[Mudifega] Video musegai

  • Nubi di ieri sul nostro domani odierno (abitudinario) (1989)
  • Agnello medley (1990)
  • Il vitello dai piedi di balsa (1992)
  • Servi della Gleba (1992)
  • Pippero (1992)
  • Noi siamo i giovani (con i blue jeans) (1993)
  • (Gomito a gomito con l') Aborto (1993)
  • Nessuno allo stadio (1994)
  • La Terra dei Cachi (1996)
  • El Pube (1996)
  • Mio cuggino (1996)
  • Born to be Abramo (1997)
  • Discomusic (1999)
  • Evvia/La Visione (1999)
  • La Bella Canzone di Una Volta (1999)
  • Tapparella (2001)
  • Shpalman (2003)
  • Fossi Figo (2003)
  • Parco Sempione (2008)
  • Ignudi fra i nudisti (2008)
  • Storia di un bellimbusto (2009)

[Mudifega] VHS e DVD

[Mudifega] Bibliografia

[Mudifega] Nòt

  1. ↑ Intervista a l'Elio in occasion del tour 2010
  2. ↑ Registrazion a TAM TAM Village, 1990
  3. ↑ Registrazion a TAM TAM Village, 1990
  4. ↑ Registrazion a TAM TAM Village, 1990
  5. ↑ Registrazion de Videomusic de on Concert a Villa Emo, 1992
  6. ↑ Registrazion de Videomusic de on Concert ad Arezz, 1990
  7. ↑ Intervista a l'Elio del Corriere della Sera del 1 agost 2009: C’erano parodie delle canzoni di Sanremo. "Verso l’ignoto" di Gianni Bella e Mogol con noi era diventato un poetico viaggio intestinale. Si offesero, quindi niente disco..
  8. ↑ articol su Repubblica del 10 ottober 1990
  9. ↑ Corriere della Sera, 13 november 1996
  10. ↑ La Repubblica, 15 febrar 1997
  11. ↑ Corriere della Sera, 25 magg 2006
  12. ↑ Articol del 7 luj 2004
  13. ↑ Del canal de Youtube de la RAI
  14. ↑ Tanti auguri Bersani
  15. ↑ La canzon La pace può
  16. ↑ La canzon 44 Tope
  17. ↑ La canzon L'uomo confonde il consenso con l'immunità
  18. ↑ La Canzon Marcio Men
  19. ↑ De on'intervista a l'Elio a Lucca
  20. ↑ Informazion in d'on forum in sul sitt del grupp
  21. ↑ Intervista a l'Elio ad Ascoli
  22. ↑ Articol in sul Corriere della Sera
  23. ↑ Del sitt del grupp
  24. ↑ Del sitt del grupp
  25. ↑ Del sitt de SKY
  26. ↑ Intervista a Firenz al Valerio Scanu
  27. ↑ Italia Amore Mio
  28. ↑ Per tutte le volte che
  29. ↑ Articol in sul New York Times
  30. ↑ http://www.rockol.it/dieci/migliorartista.htm El sitt de Rockol.it
  31. ↑ [1]
  32. ↑ Articol de l'Unione Sarda
  33. ↑ intervista a TGCOM24
  34. ↑ vivimilano.corriere.it
  35. ↑ http://musica.blogville.it/vasco-e-il-piu-bello-di-sempre-ligabue-mica-tanto-baglioni-non-ce-proprio.html blogville.it

[Mudifega] Ligamm de foeura (e font primari de l'articol)

Utegnüü da "http://lmo.wikipedia.org/w/index.php?title=Elio_e_le_Storie_Tese&oldid=666300"
Istrüment persunaj
Namespace

Variant
Azión
Navegazión
Arnes
Alter lenguv