Wikipedia:Parlóm en pó de nóter/Dicember 2010
L'Helleborus niger (en bresà: bucanéve o röza de nedàl) l'è 'na piànta de la famìa botànica de le Ranunculaceae, uriginària de l'Europa centràl e de l'Àzia Minur. La crès en regiù muntagnùze, Àlpi, Apenìni, Carpàsi, endèle radüre e 'ndèi bósch mìa tròp spès, sö teré calcárei.
L'è 'na piànta rizomatùza, perène che la pöl rià 'nfìna a 50 cm de altèsa del teré.
La fòie, che part de la bàze, i è palmàde condèn gamp lónch. I è grànde con 7-9 segmèncc, coriàcee e de culùr vért scür.
I fiùr, portàcc ensìma a 'n gamp sènsa fòie e bèl gaiàrt, i è quàze sèmper ünich (de rar i è du), i g'ha 5÷8 tépali biànch, i ciàpa 'na tìnta ròza quan che i vé ècc, condèn lèmbo ovàt-oblanceolàt e divèrsi stam.
El fröt l'è furmàt de 6÷7 folìcoi sgiónf, lónch presapóch 2 ghèi con dét divèrsi granì de somésa de fùrma bislonga. El fiorés en envéren, o al prensépe de la primaéra — a segónda de l'altitùdine — apéna che se delégua la néf.
Nòm popolàr[modifica 'l sorgent]
L'Helleborus niger el vé de spès ciamàt eroneamènte bucanéve, ma chèsto nòm l'è doperàt apò per el Leucojum vernum e (e piö coretamènte) per el Galanthus nivalis.
La definisiù Röza de Nedàl l'è piö apropriàda e la corespónt apò a la denominasiù popolàr en ótre lèngue, compàgn de l'inglés Christmas rose, l'olandés kerstroos, el fransés Rose de Noël, l'italià Rosa di Natale, ecc. en nacc...