Vetuur da Poynting

Quest articol chi l'è scrivuu in Koiné occidentala.

Ul vetuur da Poynting (S) al è ul prudott veturiaal dal caamp elétrich e dal caamp magnétich. Al töö ul nomm dal sò creaduur John Henry Poynting. Anca ul Oliver Heaviside al dedüceva chesta quantitaa-chí da manera independeent. Par la suva pròpia definizziun e i prupietaa dal prudott veturiaal, ul vetuur da Poynting al è sempru perpendicülaar al caamp magnétich e al caamp elétrich. Intal caas d'una onda eletromagnética, al punta in la direzziun da prupagazziun da l'onda e la suva valuur la representa la putenza par ünitaa d'area perpendicülara a la suva direzziun. In cheest sentüü-chí, sa pöö pensá cuma ul flüss d'energía d'un'onda eletromagnética. Al sa pöö derivá cunsideraant la cunserbazziun da l'energía e ul fatt che ul caamp magnétich al pöö mía realizá dal lavurá. Da manera matemàtica al s'espressa:

${\vec {S}}={\vec {E}}\times {\vec {H}}={\frac {1}{\mu }}{\vec {E}}\times {\vec {B}}$

intúe E al è ul caamp elétrich H e B i-è ul caamp magnétich e la densitaa da flüss magnétich, respetivameent e μ l'è la permeabilitaa dal mezz. I sò ünitaa i-è W/m². Par una onda eletromagnética íntal spazzi líber μ al è μ₀ e la magnitüüt dal vetuur da Poynting l'è relazziunada cun la densitaa d'energía da l'onda:

$|{\vec {S}}|={\frac {c}{2}}\left({\frac {1}{2}}{\vec {E}}{\vec {D}}+{\frac {1}{2}}{\vec {B}}{\vec {H}}\right)$

intúe D al è ul despiazzameent elétrich. D'òltra banda, cuma i caamp elétrich e magnètich d'una onda i ussilla, la magnitüüt dal vetuur da Poynting la s·cjangja cul teemp. La média da chesta magnitüüt luunch un teemp T (graant cumparaa cun la períuda da l'onda) la sa nòmina iradianza (E_e):

$E_{e}=|\left\langle S\right\rangle _{T}|$.

Refereenz

• "Vector de Poynting" a ScienceWorld (en anglès).
• W. Benenson et al.: Handbook of Physics (Springer-Verlag, Nova York, 2002).