Shkumbin

Chest artícol a l'è scricc in Lumbàrt, ortograféa orientàl unificàda.

Shkumbin
Nasiù	Albania
Longhèsa	181 km km
Portàda média	61,5 m³/s
El nas	Mut Valamara, Korça
El và a finì	Mar Adriatich.

El Shkumbin (en latì: Genusus) l'è 'n fiöm de l'Albania centràla. L'è cunsideràt la lìnea de spartisiù 'ntra i du dialècc principài de la lèngua albanéza: el tosk (a sud) e 'l ghegh (a nord).

En divèrsi perìocc stòrich el fiöm l'ìa cunsideràt el cunfì setentriunàl de la regiù geogràfica de l'Epiro, e 'ndei sècoi V e VI el fàa de cunfì 'ntra 'l mont cültüràl ilìrich e chèl gréco.

El fiöm l'è lónch 181 km e l' g'ha 'na portàda média de presapóch 61,5 m³/s. El nàs del mut Valamara a sud-ovest del Lach de Ohrid, arènt al paizì de Llëngë endela Prefetüra de Korça. El Shkumbin l'è alimentàt de le àive dei torèncc Dushna, Radicina, Bushtrica, Sheja, Hotolisht e Dragostunja e 'l scór en diresiù nord e 'l streèrsa Proptisht e Qukës, dòpo el ciàpa diresiù nord-est e 'l streèrsa la cità de Librazhd endoche 'l gìra 'nvèrs ovest e 'l pàsa Elbasan, Cërrik, Peqin e Rrogozhinë 'ndoche 'l töl dét le àive del fiöm Rrapun, e dòpo el và a sbötàs dét endel Mar Adriatich a nord-ovest de Divjakë.

Endela zòna de Elbasan vé tiràcc fò du canài , el Nuam Panxhi e 'l Ferras, che per mès de 'n sistéma de irigasiù i favorés l'agricoltüra endela pianüra bàsa de Cërrik.