Prima Curinz Capitel Vündes

Quel articul chì l'è scrivüü in Lumbard, cun l'urtugrafia insübrica ünificada.

Prima Curinz

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vündes

¹Devegnii i mè imitadúr, propi cuma anca mì sun chèll del Crist.
²E ve lodi perchè ve regurdii tüsscoss de mì, e tegnii i tradiziún, propi cuma ve i huu trasmetüü. ³E vöri che vialter savuv che 'l Crist l'è 'l cuu d'ogni omm, e l'omm l'è 'l cuu d'una dona, e Diu l'è 'l cuu del Crist. ⁴Ogni omm che 'l prega o 'l dis una prufezia intanta che 'l gh'ha quajcossa sül sò cuu, el fa vergogna al sò cuu. ⁵E ogni dona che la prega o la dis una prufezia intanta cunt el sò cuu desquataa, la fa vergogna al sò cuu; già che 'l vün l'è 'l medemm che 'l foss rasaa. ⁶Già che se una dona la se quata no, la gh'avarìa de tusàss; e se l'è vergugnús che una dona la se tusa o la se rasa, la gh'avarìa de quatàss.
⁷Già che un omm el gh'ha no de quatàss el cuu, perchè l'è l'imagen e la gloria de Diu; e la dona l'è la gloria de l'omm. ⁸Già che un omm l'è no d'una dona, ma una dona l'è d'un omm; ⁹già che un omm anca l'è minga staa creaa per la dona, ma una dona l'è stada creada per l'omm. ¹⁰Per chèst, la dona la gh'ha d'avègh auturitaa sül sò cuu per via di angiuj. ¹¹Anzi la gh'è né una dona sénza un omm, né un omm sénza una dona in del Signúr; ¹²già che cuma una dona l'è de l'omm, inscì anca l'omm l'è de la dona; e tüsscoss hinn de Diu.
¹³Giüdeghii intra vialter medemm: el sta bén che una dona la prega a Diu desquatada? ¹⁴La natüra medema la v'insegna no che se un omm el gh'ha cavèj lungh, l'è un desunúr a lü, ¹⁵ma se una dona la gh'ha cavèj lungh, l'è un unúr a lee? Perchè i cavèj lungh gh'hinn daa per una quataja.
¹⁶E se quajdün el par che l'è resiús, nümm gh'èmm un tal custüm, né gh'hann i gés de Diu.
¹⁷E intanta che cumandi chèst, ve lodi no, perchè vegnii insèma no per el mèj, ma per el pégg. ¹⁸Già che prima, senti che gh'hinn divisiún intra vialter quand vegnii insèma in d'assembléa, e 'l credi in part, ¹⁹già che l'è necessari che gh'hinn faziún intra vialter, perchè anca i pruaa intra vialter devegnen manifest.
²⁰Dunca, quand vegnii insèma, l'è no per mangià la zèna del Signúr; ²¹già che in del mangià ognidün el ciapa prima la sua propia zèna, e menter vün el gh'ha famm, e l'alter l'è ciuch. ²²Gh'avii minga cà per mangià e bév? O desprezii la gésa de Diu e fii vergogna a quij che gh'hann no? Che cossa a gh'avarìa de dìv? Gh'avarìa de luduv? In de chèst ve lodi no!
²³Già che mì huu ricevüü del Signúr chèll che anca v'huu trasmetüü, che 'l Signúr Gesü, in de la nocc in de la qual l'è tradii, l'ha ciapaa un pan, ²⁴e despö che l'ha faa 'l ringraziamént, el l'ha s'cepaa, e l'ha dii: «Chèst l'è 'l mè corp che l'è daa per vialter: fii chèst in de la mia memoria». ²⁵In de l'istèssa manéra anca 'l caliz, despö che hann zenaa, disend: «Chèst caliz l'è l'acordi növ in del mè sangh: fii chèst tant despess quand bevii in de la mia memoria». ²⁶Già che tant despess quand mangii chèst pan e bevii 'l caliz, pruclamii la mort del Signúr fin che 'l végna.
²⁷Dunca, chissessìa 'l mangia 'l pan o 'l beva 'l caliz del Signúr in d'un möd indègn, el sarà cupevul del corp e del sangh del Signúr. ²⁸E un vèss üman el gh'avarìa de giüdegà sé medemm, e inscì 'l gh'avarìa de mangià e de bév el caliz; ²⁹Già che chi 'l mangia e 'l bév el mangia e 'l bév cundana sü lü medemm, perchè 'l fa minga una distinziún cunt el Corp. ³⁰Per chèst, intra vialter gh'hinn tant dèbuj e malaa, e tant assee hann durmii. ³¹E se giüdegassum nümm medemm, sarìum giüdegaa; ³²Ma quand sèmm giüdegaa del Signúr, sèmm castigaa, perchè sium minga cundanaa cunt el mund.
³³Dunca, mè fradèj, quand vegnii insèma per mangià, speteev el vün i alter. ³⁴Se quajdün el gh'ha famm, el gh'avarìa de mangià a cà, perchè vegnuv insèma no per cundana, e i alter robb urdinaruu quandessìa mì vegna.

Navigaziun

• ← Indree a Capitel Des
• Inanz a Capitel Dudes →
• A l'indes