Pinin Pinell
|
|
Quel articul chì l'è scrivüü in Lumbard, cun l'urtugrafia insübrica ünificada. |
El Pinin Pinel, a l'anagrafa taliana Giuseppe Pinelli, (Nassüü a Milan 'l 21 de Utuber del 1928 e decedüü semper a Milan 'l 15 de Dezember del 1969) a l'è staa un feruvee e un anarchegh milanes e vün di fundadur del Punt de la Ghisulfa. In di agn de la Resistenza, già che l'eva 'ncamò dumà un fiö, l'ha faa la spöla in di Brigad Partisan Bruzzi Malatesta.
I prim Agn de Vida
[Modifega | modifica 'l sorgent]El Pinel l'eva nassüü in d'una fameja de uperari a Porta Cica, a Milan. De giuen l'eva faa de mestee un puu tüsscoss, fin quand che, in del 1954, l'ha truaa laur in de la feruvia. Anca se puaret, l'ha semper truaa temp de legg liber e fass una cultüra pulitega[1]. Giamò in del 1944 el tö part a una assuciassiun anarchega reünida inturna al giurnal setemanal ciamaa Il Libertario In del 1955 la'ha tolt in miee la Licia Rognini, una tusa cugnussüda a un curs seral de Esperanto.
Dürant i agn '60 l'ha segütaa a fà pulitega e in del 1965 l'ha daa 'na man a fà sü 'l circul anarchegh "Sacco e Vanzetti". In del '68, l'è staa pö vün di fundadur del Punt de la Ghisulfa.
La Mort
[Modifega | modifica 'l sorgent]
A l'era pü u manch la mezzanocc del Lündesdi, 'l quindes de Dezember del 1969, in del palass de la questüra de Milan in Via Fatebenefratelli, quand che 'l Pinel l'è crudaa sgiò de la fenestra del quart pian: in del crudà sgiò l'ha sbatüü una völta in sül curnisun e do völt in sül mür de la questüra fin che l'ha faa un tunf in sül söl de la curt del palass de la questüra. El prim a sentì 'l tunf e a truà 'l Pinel spetasciaa al söl, l'è staa vün di tanc crunista dree a trà la la gamba in di ufisi de la pulissia in quij di li, ciuè in di dì 'pena dopu del s'ciop de la bumba in piassa Funtana: el se ciamava Aldo Palumbo, crunista de l'Unita, e l'è staa lü a ciamà l'ambülansa.
Ij infermee riven asquas sübet ma per el Pinel el gh'è propi negot de fà: el tran si in vita ancamò cunt un tüb per l'aira, ma l'è dumà un vegetal, sensa un quaj respuns cerebrategh, e insci i dutur 'l lassen murì
La matina despö de la sua mort, vegnen föra i giurnaj che disen che 'l Pinel el s'è "süicidaa". La sua mort l'è stada sübet cuntestada de la gent, suratüt di antifascista Milanes, che s'hin dumandaa cuma l'è che lè vün el fa cünt de sbàtes giò de la fenestra sensa che nissün, in d'una cambara impinida de pulòt, el ferma.
Pö, 'l fat che, in del burlà sgiò, 'l vaga a sbat in sül curnisun el fa 'gnì di gran dübi in sü la storia cüntada sü del Cumisari Luigi Calabresi e di so agent: vün che 'l sbat in sül curnisun l'è vün che l'è staa sbatüü sgiò quand che l'era giamò sensa sens: vün che 'l solta sgiò deperlü 'l va minga a sbat in sü la curnis del mür perchè in del soltà sgiò vün el se da un puu de slansc[2].