Pica!

Quel articul chì l'è scrivüü in Lumbard, cun l'urtugrafia insübrica ünificada.

Pica!
Album in stüdi
Surtii	2008
Gener	Folk rock
Dürada	69:47
Cà discugrafiga	Tarantanius
crunulugia di album de Davide Van De Sfroos
Akuaduulza (2005) Yanez (2011)

Pica! a l'è un disch del Davide Van De Sfroos surtii el 8 febrar 2008. El disch l'è rivaa anca al quart post de la classifiga di album del Italia.

Canzun

1. El puunt
2. Lo sciamano
3. L'Alain Delon de Lenn*
4. New Orleans
5. La ballata del Cimino
6. Il minatore di Frontale*
7. 40 pass
8. La terza onda
9. La Grigna
10. Il costruttore di motoscafi
11. Fiil de ferr
12. Furestee
13. Il cavaliere senza morte
14. Loena de picch*
15. Retha Mazur

* = in talian

Vari infurmaziun sura i canzun

• El puunt l'è la storia de un om che 'l speta la sua murusa sota un punt, anca se pö el ven föra che lee l'ha lassaa per un alter, e dunca sota quel punt ghe rivarà pü.
• New Orleans l'è una canzun dedicada a la cità americana, che in del 2005 l'era stada quasi trada giò del tüt da un üragan ciamaa Katrina. L'è la storia d'amur tra un bagai e una tusa nassüü propi quand el riva Katrina.
• La ballata del Cimino l'è la storia de un sfrusadur, che menter l'era dree a purtà di sigaret in Svizzera el ven truvaa de la Finanza. Alura, per salvàss, el se büta in del lagh e pö el resta per ur tacaa a un sass senza nissün vestii föra che i scarp e i müdand. El prutagunista de la canzun a l'esist verament.
• Il minatore di Frontale el gh'ha 'me prutagunista un minadur valtelines (Fruntal a l'è una fraziun de Sundel) e i sò esperienz e sentiment in del fà el sò lavur in gir per el mund. A la gent e al cumün de Sondel la gh'è piasüda a tal punt 'sta canzun che l'ha numinaa el Van de Sfross citadin unurari e a la sua presenza l'ha dervii una növa via ciamada dei minör (ciuè, in sundalasch, di minadur). Quest a l'ha purtaa anca di prublema cun la prefetüra de Sundri, perchè in teuria se pudaria minga dà nom in lenguv diferent de l'Italian in di regiun minga autonum. El cas a l'è anmò dervii.
• 40 pass la parla di stori de trii om che del lagh vegnen giò a Milan: ciaschedün el gh'ha i sò speranz, che però cul passà del temp van a ramengh, e dunca lur finissen per fà di rob minga bei. El prim, un prufessur üniversitari, el vegn un terurista de sinistra; el segund, che l'è vegnüü un gigolò, a l'è anca un bel drugaa; el terz, che 'l vureva fà el pulee, el diventa la guardia del corp de un senatur. Per una resun o per un'altra, i trii finissen in galera, e quand che sorten föra per la bona cundota se tröven tücc insema denanz al Dom de Milan, cume per dì che han ritruvaa la fee. La canzun la gh'ha anca una cover in italian (un pinin püssee cürta) cantada dal Daniele Ronda in del sò prim album, e ciamada Tre Corsari. In quela cover lì el ghe canta anca el Davide.