Paviment rialzaa

Quest articol chì l'è scrivuu in lombard, grafia milanesa.

El pavimént rialzàa^[1] (anca ciamàa pavimént galleggiànt) a l’è on suppòrt de sòlit fàa su de sòlit de pannèj de grandèzza standard 60x60 cm e d’on telar metallich de rialz.

El pannèll, in sò turno, l’è fa su de trìi elemént principàl:

on rivestimént de sora ch'a l'è el pian che se camina (che ‘l po’ vèss fàa de gres porcellanàa, laminàa, PVC, gòma, linòleum, granii, palchè, etcetera);
on'anima intèrna (fada de mes'ciòss de legn a densità alta e spessór de 38 mm oppùr de solfaa de calcio del spessór de 30 mm);
on'equilibrànt inferiór (generalmént on foeuj de allumini de 5 micron, che ‘l fa el mestée de la barriera contra de l'umidità, oppùr on foeuj/vaschètta de azzal, per aumentànn el servizzi).

Tucc i part a hinn miss insèma, calibràa e bordàa.

Anca i telar per i pavimén rialzàa pòden vèss divèrsi, con di colònn e di travèrs de vari tipi, in resón del el càregh pu o manch elevàa che gh’hànn de tegnì su. El càregh mìnim ch' on pavimént soraelevàa l’è bon de sostegnì, l’è generàlment trìi vòlt tant qual del sorée de sòta, e la soa altèzza dal sorée, de sòlit la pò vèss regolada fin anca oltra vun meter in altèzza.

El studi e la tecnologia i hànn menà al svilùpp di pavimént galleggiànt, sia quant a la progettazión (de fàtt l’è possìbil catà foeura di pannèj foeura de la misura standard compagn di 60x120 cm e di alter anmò), sia quant a la sicurèzza, per esempi el pavimént rialzàa el pò vèss fàa su de manera de fàll resist al terremòt. {senza di font}

A vegnen comunque ciamàa pavimént galleggiànt in generàl anca quèj che hinn fàa su d'on quajsevoer materiàl tradizionàl dopràa per fà su i pavimént (marmor, piastrèll, palchèt etcetera) separàa del sorée per mèzz d'on materiàl che l'isolà del sorée medèsim.^[2]

Utilità

L'utilità de quèll tipo de pavimént chì l’è soratùtt l’isolamént acustich infra i ambiént separàa del sorée, poeu la possibilità de mèttegh denter tucc i impiànt in del spazzi che ’l se crea sòta el pavimént (plenum). De sorapù el pavimént l’è fàa su de mòdol e i elemént pòden vèss scambià vun con l’alter inscì de permèttegh a l’ambiént de vèss ispeziona fin sòta el pavimént medésim quand che se voeur, de manera de sicurà facilment la manutezión di impiant in del cors del temp. El pavimént galleggiànt l’offrìss tanti vantàgg in la prosecuzion di lavorà per la costruzión de l’edifizzi (defàtt, l’è nò necessari spettà el callaòd di impiànt innanz de mètt giò el pavimént, inscì de risparmià del temp e finì prima tucc i lavorà). A l’è on tipo de pavimént ideàl de vèss installa in di ambiént direzionàj, commerciàj, ristorant, padiglión, center de elaborazion di daa, etcetera.

Freguenza de taj del paviment galleggiant

L'indebolimént del frecàss fàa del pavimént galleggiànt l'interèssa domà i freguénz del son sora 'na cèrta freguenza ciamada freguenza de tàj che la pò vèss calcolada inscì:

$f_{o}={\frac {1}{2\pi }}{\sqrt {\frac {s'}{m'}}}$ [ Hz ]

indoe:

s' l'è la rigidità dinamica per unità de superfice del strat isolànt de sòta che 'l ten su el pavimént galleggiànt [N/m3];

m' l'è la massa per unità de superfice del pavimént galleggiànt [kg/m2].

Sòta la freguenza de tàj gh’è nò 'n' indebolimént del frecàss, inscambi de là de la freguenza de taj l’indebolimént del son el và su insèma a la freguenza “f “ pressppòch adrèe a la leg:

\Delta L=30\cdot log{\frac {f}{f_{o}}}

attenzión che 'l 30 l'è on valór tipich ma che 'l pò varià segond la struttura.

I materiàj pussée mòrbed hinn mèj de già che la soa freguenza de tàj l’è pussée bassa. ^[3]

Vos correlaa

Riferiment

↑ Matterazzo U., Il pavimento sopraelevato. Sistema costruttivo, applicazioni e normative, Rimini, Maggioli, 2015.
↑ Michele Pascali (2015). Acustica ambienti interni (in italian). Grafill, 145. ISBN 978-88-8207-781-5.
↑ Michele Pascali (2015). Acustica ambienti interni (in italian). Grafill, 146. ISBN 978-88-8207-781-5.

[1] Matterazzo U., Il pavimento sopraelevato. Sistema costruttivo, applicazioni e normative, Rimini, Maggioli, 2015.

[2] Michele Pascali (2015). Acustica ambienti interni (in italian). Grafill, 145. ISBN 978-88-8207-781-5.

[3] Michele Pascali (2015). Acustica ambienti interni (in italian). Grafill, 146. ISBN 978-88-8207-781-5.

[1]

[2]

[3]