Polver
La polver (o polvera, puffia[1]) l'è 'l nomm generegh doperaa per ciamà la materia spartida in partesei de diameter comprenduu tra 1 e 100 micrometer.
In su la terra la polver la se troeuva in l'atmosfera e la riva de vari sorgent, tant 'me 'l soeul, eruzzion volcanegh, l'inquinament. I polver sospenduu per ari gh'hann di efett bei gross in sul clima e la salut de l'omm.
La pover la se troeuva anca in del spazzi, e la fa nass la lus zodiacal. I nivoi de gas e polver hinn consideraa i antenaa di sistema planetar.
El comportament fisegh de la polver la ghe va dree a legg che poeuden minga semper vess paragonaa a quei di solid o di fluid.
La polver de la cà l'è fada su de polver atmosferegh insemma a la polver provocada de chi che viv in cà (tocchelitt de ongg, de pell e de fiber di vestii). In gener la vegn trada via con l'aspirapolver, coi strasc o con la scova.
El nomm
[Modifega | modifica 'l sorgent]El termen polver coi sò variant el riva del latin pulvis, pulvĕris[2], con l'istess significaa (termen ligaa anca a pŏllen, pollĭnis). L'è doperaa in quasi tucc i lengov romanz, magari cont ona quai mudazion (aragones e spagnoeu polvo, catalan pols, frances poudre, galizzian po, portoghes poeira, romen praf, romanc pulvra, sardegnoeu prùere).