Nino Cimasoni

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.

El Nino Cimasoni (1901-1968) l'è staa on poeta lombard.
Nassuu in del 1901 a Lugan de pader bosin, l'ha vivuu in del Varesott, per poeu morì in del 1968. L'ha lavoraa 'me giardinee a la Villa Cicogna de Bisus'c, a duu pass de Vares.
A l'è staa vun di fondador del Cenacolo dei Poeti e Prosatori Dialettali Varesini e Varesotti, vun di brocch de la Familia Bosina. I sò poesii hann taccaa a vess publicaa e regolt a partì di Agn '70.

On esempi de poesia[Modifega | mudìfica 'l sorgènt]

La poesia Pensionaa, ciappada de la regolta I poesii d'on giardinee.

Mi e l Pobia semm du pensionaa
amis, cressuu insema e tucc duu... nett.
Mo semm giò da gir, mezz sgarelaa,
emm cercaa on mistee on poo quiett.

Ol Pobia, ca l'è grand, brutt e vilan,
l'ha troaa impiegh pa'ra stagion
come spoentapassar d'on paisan,
ca la paga fasoeu e formenton.

Però al ga fa inscì ogni tant:
on moviment coi brasc... e mia dormì!
L'è mia on mistee poeu tant pesant:
al gh'ha da fà... nagott ses or al dì!

Mi avaria troaa come fantasma
(m'ha offert ol post ol Cont Delbell)
ma l'è mia on mistee ca m'entusiasma,
anca parchè m'hann dii che su in castell

a compariss ogni tant quel... giust,
e a troall in sul mestee gh'ho mia gust:
al sarà in regola e autorizaa,
e poeu, s'intend, iscritt al sindacaa!

L'important l'è ciapà on poo da danee,
parchè a viv con ra pension, l'è grisa;
inn assee, sì e nò, da fumà e no bee
e a lavà nò (par no strasciala) la camisa!

Emm pensaa che, cont on quei quattrin,
'na quai sira a femm 'na pell da vin,
a femm "schiamazzo"... e sa femm ligà;
inscì ga tocarà dàmm da mangià

a spess da quii da Roma, che i pension
gai cressan ai stipendi d'on milion!
Lor disan: "S'ai femm crepà in partenza,
gh'è bel'e risanaa ra PREVIDENZA!"

Bibliografia[Modifega | mudìfica 'l sorgènt]

  • AA.VV., Antologia della poesia nelle lingue e nei dialetti lombardi dal Medioevo al XX secolo, Milan, Libri Schweiller, 2006.