Nòsta Sciùra de Coromoto

De Wikipedia

Chest artícol a l'è scricc in Lumbàrt, ortograféa orientàl unificàda.


Statüa de la Vèrgen de Coromoto in del Santöare de Guanare
Icóna de la Santa Madóna de Coromoto

La Nòsta Sciùra de Coromoto o Vèrgen de Coromoto l’è la patròna del Venesuéla e l’è ü di nòm marià dovràcc da i catòlech per ciamà la Madóna dovràt de quando la s’è fàcia èt in del 1652 a l’indio de nòm Coromoto e a la sò moér.

I aparisiù[Modifega | modifica 'l sorgent]

Quando ‘n del 1591 l’è nasìda la sità de Guanare, capitàl del istàt de Portuguesa, i ìndios Cospes che i stàa de cà de chèle bànde lé i s’è scondìcc in de la sèlva a nòrt de la sità per scapà da i conquistadores e isé l’éra malfà per la Céza Catòlega riàga a evangelizài.

‘l 8 de setèmber del 1652 in de la sèlva ‘ndóe i éra scapàcc i ìndios, la Madóna la s’è fàcia èt al cacìch di Cospes de nòm Coromoto e a la sò moér e la gh’à dicc in de la sò lèngua Và a la cà di biànch e domàndega che i te mète l’aqua söl có per pudì ‘ndà ‘n cél, cioè la gh’à domandàt a lü e a la sò tribù de fàs batezà.

Segónt la tradisiù ol cacìch l’avrès contàt sö chèl che gh’éra söcedìt al sò encomendéro, don Juan Sánchez, che l’ gh’à consigliàt de preparà la sò tribù a ciapà la catechézi e ‘l batézem prìma de 8 dé.

L’è isé che tàce ìndios i s’è convertìcc e i s’è fai batezà, menimà ‘l cacìch l’è scapàt e alùra la Madóna la ghe s’è fàcia èt amò tùrna e lü fó di stras del nervùs l’à slongàt ol bras per ciapàla ma la Madóna l’è sparìda. Dòpo ès istàcc però pi-àt da ü serpènt velenùs, ol Coromoto l’è turnàt a Guanare, l’ìa ferìt e l’éra dré a mör, isé l’à domandàt de ès batezàt, l’à riceìt ol batézem da ü de Barinas, ‘l s’è convertìt e l’è guarìt. Alùra l’à domandàt a i ìndios ribèi che amò i éra sóta i sò ùrdegn de batezàs pò a lur, l’à cambiàt ol sò nòm con chèl de Àngel Cüstòde e l’è mórt mia prima de ès dientàt bèl vècc.

La Canonizasiù[Modifega | modifica 'l sorgent]

In del 1950 ‘l Papa Pio XII l’à lüminàt la Madóna de Coromoto, Patròna del Venesuéla, ‘l Papa Gioàn Pól II l’à visitàt ol santöàre de la Madóna de Coromoto e l’à ‘ncurunàt la sò stàtüa, menimà ‘l Papa Benèt XVI in del 2006 l’à lümiàt Bazìlica Minùr ol Santüàre Nasionàl de la Nòsta Sciùra de Coromoto.

A Roma ‘n del quartér Gianicolense la se tróa la Céza de la Nòsta Sciùra de Coromoto sura la quàl gh’è ‘l tìtol cardinalése de la Nòsta Sciùra de Coromoto ‘n San Giuàn de Déo, istitüìt dal Papa Gioàn Pól II ol 25 de mas del 1985.