Martin Lüter

Quel articul chì l'è scrivüü in Lumbard, cun l'urtugrafia insübrica ünificada.

El Martin Lüter, retrat del Lucas Cranach, 1529. Desura 'l cuu 'l gh'è 'na scrita in Latin che la dis: "Cunt el stà citu e 'l sperà sariuf fort."

La firma del Martin Lüter

El Martin Lüter (nassüü 'l 10 de Nuember del 1483 a Eisleben, in Germania; mort el 18 de Fevree del 1546 in del medem sit indua l'era nassüü) l'è staa un mönegh gustin, un prufessur de teulugia e 'l teòlegh de la Refurma Prutestanta. El Lüter l'ha furmaa 'l so pensee e la sua fee refurmatori despö che l'ha tacaa sü a basass ünigament in sü la Parola fada carna travers el Signur Jesüss Crist.

A chela manera chi lü 'l vuleva liberà la Fee Cristiana dij erur che la Gesa de Ruma l'eva cumpii in del destacass de la Vera Parola del Signur inscí 'ma l'è repurtada in del Nöf Testament. El so enfatizzà la Grassia del Signur, i so predegh, i so scrít e suratüt la sua Bibia han daa 'na müdada al mund mudern che fin al Lüter l'era staa duminaa de la Gesa Catolega. La sua Refurma l'è pö stada druada de vargün prenzipaa üropee in del raspà via un puu de pudè del Papa e de l'Imperadur. Pö, suta l'inflüss del Lüter, ma cuntra la sua ideja, la Gesa la s'è s'cepada e di nöf Ges Evangelegh Prutestant hin staa faa sü.