Mario Fargetta

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Mario Fargetta (Lissún, 19 lüj 1962) l'è ün DJ e produtùr de müsica di discutech italiàn.

La cariéra[Modifega | modifica 'l sorgent]

Giamò da bagaj Fargetta l'ha cuminciàa a fà'l DJ e'l giugava anca al balùn. In del 1980 l'ha vingiüü ün cuncurs de DJ e dopu l'ha cumincià a lavuràa in d'üna piscinina radio lucàal de Munscia, "Super Antenna".
In del 1986 el vàa a lavurà a "Radio Deejay" e'l desmett de giugà al balùn a livèll diletantistich. A cumincià dal 1987 el culabura ai prugràmm "Deejay Time" e "Deejay Parade", i düü trasmissiùn de radio pussee famùs di ann Nuvanta.
In del 1991 l'ha fàa el sò primm disch, The music is movin', che, insèmm a la sò segunda canzùn, Music (vègia canzùn de John Miles), de l'istess ann, l'ha fàa nà dent in di classifich de vendita americàn e inglès. I olter canzùn del Fargetta ch'hann avüü succèss in quij ann hinn stàa Your love (1993), This time (1994) e Midnight (1995).
In del 1998 l'ha presentàa, insèmm al DJ Albertino, "Italia Unz" sül canàal Italia Uno. In del'istess ann, insèmm al DJ Alex Farolfi, l'ha fàa sü'l prugèt The Tamperer feat. Maya: la prima canzùn, Feel it (ciapada da üna canzùn dij Jacksons Five), l'è rivada prima in di classifich inglès, menter la segunda, If you buy this record, l'è rivada terza.
In di ann dopu, Fargetta l'ha tiràa innanz a fà canzùn de per lüü: I will rise again (2001), Good times (2002), People on the beat, Shining star (2006) e All I need (2007). Al dì d'incö el partecipa a düü prugramm de "Radio Deejay": "Disco Ball" e "Dance Revolution".

Fargetta cumè produtùr[Modifega | modifica 'l sorgent]

In del 2003 Fargetta l'ha crumpàa trij cà discugrafich de müsica di discotech: la Hands Up, la My Life e la Whim.

La sò vida privada[Modifega | modifica 'l sorgent]

Anca se'l giuga püü al balùn seriament da ün frach de ann, Fargetta el giuga amò in di partidi de beneficenza. In del 2006 s'è spusàa cun la presentatrìs televisiva Federica Panicucci, dopu che hin stàa insèmm dés ann. Gh'han düü bagaj: Sofia e Mattia.