Mario Delpini

Quest articol chì l'è scrivud in lombard, con la Noeuva Ortografia Lombarda

El Mario Delpini (Gallaraa, 29 luj 1951) a l'è un prelad italian, arcivescov de Milan del 7 de luj 2017.

Biografia

Nassud a Gallaraa, fioeul de l'Antonio e de la Rosa Caruggi, el vegn su a Ieragh cont Oragh: el va dent al seminari arcivescovil de Milan in l'otover del 1967 e 'l 7 de sgiugn 1975 l'è ordenad prevet del Giovann Colomb, in del Dom de Milan. El deventa insegnant in seminari e in del 1980 el se laurea in letere a l'Università Catolega del Sacher Coeur cont una tesi in su la didatega del latin, e 'l ciapa poeu anca la licenza in teologia.

In del 1989 el deventa retor del seminari minor de Venegon e in del 1993 retor di quater agn de teologia. L'insegnarà anca a la facoltà de teologia de l'Altitalia e in del 2000 el deventa retor magior di seminari de Milan. El lassa el seminari del 2006, quand che 'l Dionigi Tettamanzi el fa vicari episcopal per la banda de Meregnan.

Vescovad

El 13 de luj del 2007 el Papa Benet XVI el fa vescov ausiliari de Milan e titolar de Stefaniach: el sarà ordenad vescov, cont el Franco Giulio Brambilla, el 23 adree, semper in Dom, del Tettamanzi insema a l'arcivescov Francesco Coccopalmerio e ai vescov Renato Corti, Marco Virgilio Ferrari e Giuseppe Betori. Del 2007 al 2016 l'è secretari general de la Conferenza di vesch de la Lombardia.

El 5 de avril 2012, in la messa del Crisma, l'Angelo Scola el nonzia de fàll vicari general de l'arcidiocesi e in del 2014 l'è fad anca vicari per la formazzion del cler.

Arcivescov de Milan

El 7 de luj del 2017 el Papa Francesch el fa metropolita de Milan, desgià che el Scola el s'era dimetud per l'età, e 'l ciapa possess el 9 de setember, cont el Scola, delegad del Papa, che ghe dà el pali al Santuari de Sant Peder a Seves. El 21 de setember l'è elesgiud di vesch president de la conferenza lombarda di vesch al Santuari de Carevasg, el farà el so andà dent solenn in l'Arcidiocesi el 24 de setember e 'l 4 de otover el dà foeura la soa prima letera pastoral, cont el titol "Vegn, te foo vedè la mier de l'agnell" e 'l tira a man poeu un sinod minor in su la gesa di sgent.

In del 2018 el nomina el Franco Agnesi vicari general e 'l dà foeura la soa segonda letera pastoral, cont el titol "el cress el vigor in del so camin" e 'l se met in visita pastoral. In del 2019 el dà foeura la terza letera, cont el titol "la situazzion l'è ocasion. Per el progress e la gioja de la vosta fed".

Al temp de la pandemia de COVID-19, el 11 de marz del 2020, el va in su la terraza del Dom de Milan a domandàgh l'intercession de la Madonina, roba che 'l met al center de l'opinion publega e 'l rend una vos de autorità in del panorama de la gesa italiana. Semper per l'ann 2020/2021 el scerniss de dà minga foeura una letera pastoral ma de fà una proposta de dialegh a l'arcidiocesi.

El derva una noeuva visita pastoral el 9 de sginer 2022, che la forniss el 11 de sgiugn del 2023.