Kawaii

De Wikipedia
Lumbard ucidental Quest articol chì l'è scrivuu in lombard, grafia milanesa.
Estetega kawaii in del vestìss

Kawaii (かわいい [kaw͍aiꜜi]) a l’è on termin de la lengua giapponesa, ch’el correspond al lombard “carin”, “adorabel”. El termin, in riferiment al Giappon e a la sò cultura, el se riferiss a ona qualidàa estetega caratterizzada del vess carin, ma anca cont ona apparenza innocent, infantil, e minga tropp elaborada.
La qualidàa del kawaii a l’è devegnuda ona caratteristega de la cultura popolara giapponesa a partì di agn Vottanta.

Etimologia[Modifega | modifica 'l sorgent]

La parolla giapponesa kawaii scrivuda (de l'alt al bass) in kanji, hiragana e katakana

La parolla kawaii la vegn de la fras 顔映し kao hayushi, letteralment “la faccia la brilla”, on moeud figurativ per riferiss al devegnì ross in faccia per vergott de bell. Cont el passà di temp el signifegaa l’è devegnuu quell modern de “carin”, e la parnonzia de kawayui (Hiragana: かわゆい) l’è devegnuda kawaii (かわいい).

La pupart di volt a l’è scrivuu cont el sillabari hiragana, e donca かわいい, ma la gh’è anca la scrittura 可愛い cont i caratter (kanji) domà scernii per la parnonzia e minga per el signifegaa (on process ciamaa ateji). De chì l’è stada fada su ona etimologia popolara, “se poeu amà” o “poeu vess amaa”: el primm kanji, 可 (ka), el voeur dì “permittuu”, menter el segond, 愛 (ai), el voeur dì “amor” - い (i) l’è la sillaba dell’hiragana cont la qual la finiss ona part di aggettiv in la lengua giapponesa.

Estetega[Modifega | modifica 'l sorgent]

On aereo giappones decoraa a tema Hello Kitty

El kawaii l’è incoeu consideraa, anca de studi sociologegh, coma part integrant de la cultura popolara giapponesa: segond el Sōichi Masubuchi, l’estetega del kawaii l’è devegnuda pussee importanta e l’ha sostituii l’estetega “classega” del Giappon, fondada pussee in sul bell e raffinaa.

L’importanza del kawaii in la cultura giapponesa l’è spantegada in de per tutt, coma in del mangià (coma esempi i dolz), in del vestì, e in di prodott de consum de massa.

Nassuu soratutt intra i tos in di agn Settanta, e poeu anca ciappaa di omen, el kawaii l’è al dì d’incoeu minga domà part de la cultura di giovin, ma l’è pensaa per i giappones di tucc i edàa, cont coma esempi anca i pussee comun strument per la cà che responden a ona estetega “carina”. Anca treni e aerei in Giappon gh’hann despess decorazion kawaii in su di lor livree, cont personagg di Pokémon o la Hello Kitty; i prefettur del Giappon, coma anca on bon numer de cittàa, istituzion cultural, distrett de polizia, e la television nazionala (NHK), gh’hann tucc di mascott kawaii doperaa in pubblicitàa o coma identificazion.
Anca la Wikipedia giapponesa la gh’ha ona mascotte kawaii, la Wikipe-tan