Julia - Le avventure di una criminologa

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.

Julia - Le avventure di una criminologa (in lombard: Julia - I aventur de ona criminolega) a l'è on fumett in lengua italiana publicaa de la Sergio Bonelli Editore.
A l'è pensaa e scrivuu del Giancarlo Berardi, e l'è publicaa ogni mes a partì de l'ottober del 1998.
El fumett el cunta su i stori e i indagin de la Julia Kendall: ona giovena professora de criminologia de l'universitaa de Garden City (citaa inventada del New Jersey) che la ghe da ona man a la polizzia per i cas pussee complicaa.

Personagg[Modifega | mudìfica 'l sorgènt]

Principai[Modifega | mudìfica 'l sorgènt]

  • Julia Kendall: la protagonista de la serie. La gh'ha on poo pussee de trent'agn, e la insegna criminologia a l'Universitaa de Garden City. Per la soa cognossenza di pensee di criminai, la procura de la citaa la ghe domanda de spess ona man per ressolv di cas compless (soratutt i omizzidi). La viv indeperlee insemma a la soa gatta Toni. La gh'ha la faccia de la Audrey Hepburn.
  • Myrna Harrod: la granda nemisa de la Kendall, a l'è ona serial killer e la compariss giamò in del primm episodi de la serie. La Harrod l'è ona psicopatega, cressuda cont el pes de on pader violent e de ona mader che l'era scapada via (ma lee la pensava che la fuss morta). Omosessuala, la comenza a coppà i tosann che l'ha menaa in lecc e a tiraggh via i oeugg cont on cortell. Descoverta de la Julia a la fin del primm episodi, de quell moment l'è semper dree a scappà e a mazzà: ma intanta l'ha anca desvilupaa on amor per la soa antagonista. El sò obiettiv e 'l sò sogn a l'è quell de stà insemma a la Julia per ona nocc e poeu coppalla.
  • Alan J. Webb: tenent de la polizzia de Garden City. A l'è on omm seri e de princippi, che l'ha faa el soldaa e che 'l gh'ha on gran sens de la disciplina. Per la soa vision del mond on poo conservadora e quadra, el ruza despess con la Julia. In de l'istess temp, a l'è anca tiraa de lee, e l'è gelos de tutt i relazzion (longh o curt) de la criminolega. El gh'ha la faccia del John Malkovich.
  • "Big" Ben Irving: sergent de la polizzia de Garden City. Al contrari del Webb, a l'è ben pussee bonascion, e de fatt a l'è quell che 'l recomponn i raport in tra el Webb e la Kendall quand che quei duu lì ai tacchen a ruzà tropp. El conoss la Julia de quand che lee l'era ona tosanetta. A l'è sposaa con la Rose (che la se ved mai in di fumett). El gh'ha la facia del John Goodman.
  • Leo Baxter: detective privaa, a l'è el mej amis de la Julia. A l'è detestaa del Webb (che 'l se fida nò de lu e l'è anca gelos de la soa amicizzia con la Julia), ma a la fin i duu omen ai riven despess a rispettass. Cressuu cont on pader adottiv de pell negra, el gh'ha la fama del donnatt (soratutt con di tosann de la pell scura). El gh'ha la faccia del Nick Nolte.
  • Emily Jones: resgiora de color de la cà de la Julia. La s'è sposada on monton de voeult, e la gh'ha on gran numer de fioeu. A l'è stada on'ativista di diritt di negher, a l'è piena de bona volontaa e la voeur vess comè ona segonda mader per la Julia. Soratutt, la voeur che la Julia la se metta, in fin, cont on omm (lee la spera che 'l sia el tenent Webb, anca se l'è on polee bianch). Vuna di sò caratteristegh a l'è la manera de parlà, perchè despess la scapuscia in di paroll e la tira foeura, senza vorell, di termen de rid. La gh'ha la facia de la Whoopi Goldberg.
  • Lilian Osborne: la nona de la Julia. A l'è stada come ona mader per i dò sorell Kendall, perchè i sò genitor de lor hinn mort in d'on incident quand che la Julia la gh'aveva apena trii agn. Dolza e savia, l'ha scernii lee de andà a viv in de 'n ospizzi per vess minga in tra i pee de la nevoda in de la soa cà. A bon cunt, la Julia la va trovà despess, soratutt per ciamaggh di consili in su la vitta e in sui sentiment. La gh'ha la facia de la Jessica Tandy.
  • Ettore Cambiaso: comissari genoves, el riva a Garden City (numer 175) per on'indagin internazzionala ligada a on omizzidi de la 'ndrangheta calabresa. Subet el se liga con la Julia, e dopo poch temp i duu ai strengen ona relazzion che la va inanz ancamò adess. A l'è ona relazzion complicada perchè lu el viv ancamò a Genova e lee in di Statt Unii. El comissari Cambiaso el viv con sò pader a Genova, intant che soa mader la s'è risposada e la sta de cà a Napoli. A l'è spartii con la soa miee e 'l gh'ha ona tosa, Francesca, de tredes agn. El gh'ha la facia del Michele Riondino.

Segondari[Modifega | mudìfica 'l sorgènt]

  • Norma Kendall: l'è la sorella pussee piscinina de la Julia. La fa la modella e l'è semper in gir per el mond. La gh'ha avuu di problema gross con l'eroina (el par che adess l'ha desmettuu de drogass) e la gh'ha tanti moros.
  • Matt Bradley: agent del FBI, a l'è staa on compagn de universitaa de la Julia. Ogni tant el ghe domanda a la Julia ona man per di cas federai: in pagament, anca la Julia el ghe domanda a lu on quai ajutt (soratutt a nivell de informazzion) per di cas de la polizzia de Garden City. El gh'ha la facia del Sidney Poitier.
  • Tina Davis: giornalista de la Garden TV, l'è semper dree a cercà foeura on quai scoop per la soa television, e per quest l'è poch soportada di polee, Inscambi, a l'è on'amisa de la Julia, e despess le intervista per el sò programa.
  • "Big Bear" Drummond: vun di boss de la malavitta de Garden City. Grand e gross e negher, el sta semper incrusciaa in del sò local, e 'l ghe da confidenza quasi a nissun. El gh'ha la facia del Ving Rhames.
  • Harlan Hoover: giornalista de la True TV. Al contrari de la Davis, el gh'ha quasi nissun scrupel professional, e per ciappà ona noeuva el se cura minga de fà dagn. Inoltra l'è on giustizzialista e l'è semper pront a fà polemega in su la quistion de la sigurezza, anca perchè 'l sa che l'è ona manera de fà cress el numer de spettador de la soa trasmission.
  • Luther Jones: vun di tanti fioeu de l'Emily. Tenich informategh bell espert, on temp l'era anca on hacker, ma poeu l'ha dervii on ofizziett de consulenza on line. A l'è on amis de la Julia, e l'è semper pront a daggh ona man per desquattà i misteri de la red. El gh'ha on raport complicaa con la mader, che la pensa che lu l'è dree a trasà via el sò temp a staggh adree al computer. El gh'ha la facia del Spike Lee.
  • Jeffrey Noah: polee de la squadra anti-terrorism, el deventa el moros de la Julia (episodi 96) per on para de agn, fina a quand che lee le molla, perchè la voeur on ligamm pussee seri de quell che lu el podeva inzebì.
  • Timothy "Tim" O'Leary: lader "gentilomm", che ogni tant el compariss in de la vitta de la Julia per tiralla dent in di sò aventur, che despess la pora criminolega la gh'ha de desbrojà. La Julia la gh'ha per lu on raport de amor-odi. Lu el gh'ha la facia del Cary Grant.
  • Michael H. Robson: el procurador de Garden City. L'è lu che 'l gh'ha ciamaa a la Julia de toeu part ai indagin de la polizzia. La Kendall la gh'ha nò ona granda stima per lu, perchè le ved soratutt come on politegh che 'l pensa pussee al consens di elettor putost che a l'esigenza de desbrojà di cas e fà giustizzia.
  • James Tait: a l'è el dotor anatomopatolegh de la polizzia de Garden City. Semper present e seri, el conoss la Julia de quand che lee l'era ona tosotta.
  • Nick Yorgis: mecanegh de origin grega, el cura la vetura de la Julia. Defatti la Kendall la guida ona Morgan 4/4 del 1967, che 'l Yorgis el ved tant 'me ona sort de maraveja. Per 'sta reson, el se refuda de fass pagà per i riparazzion, e 'l voeur mai che lee la cambia vetura.

Riferiment[Modifega | mudìfica 'l sorgènt]