I paroll d'on lenguagg, car sur Gorell
I paroll d'on lenguagg, car sur Gorell l'è ona poesia del 1812 scritta dal Carl Porta. L'è dedicada a on scior che 'l offendeva la lengua lombarda.
Test original[Modifega | modifica 'l sorgent]
I paroll d'on lenguagg, car sur Gorell,
hin ona tavolozza de color,
che ponn fà el quader brutt, e el ponn fà bell
segond la maestria del pittor.
Senza idej, senza gust, senza on cervell
che regola i paroll in del descor,
tutt i lenguagg del mond hin come quell
che parla on sò umilissim servitor:
e sti idej, sto bon gust già el savarà
che no hin privativa di paes,
ma di coo che gh'han flemma de studià:
tant l'è vera che in bocca de Usciuria
el bellissem lenguagg di Sienes
l'è el lenguagg pù cojon che mai ghe sia.
Anàlisi[Modifega | modifica 'l sorgent]
La poesia a l'è, in sostanza, on'apologia di lengov locai, men nobilitaa de quej nazionai, che la dis che, in di per se, ògni lengua a l'è bona de dì tuscoss e de esprim tucc i concett e che l'è compit di personn doperàj ben e che la capacità de fàll a l'è no pròpia di città ma de la gent che la gh'ha la voeuja de studià e se fàss ona coltura.
El Porta el fa proppi on esempi in del dì che la lengua toscana, che per lu a l'è bella bellenta, in la bocca del scior Gorell, a l'è la lengua pussee stupida che la ghe sia.