Gioanna d'Arch

De Wikipedia
Va a: navegá, truvá
Lumbard ucidental Quest articol chì l'è scrivuu in lombard, grafia milanesa.
La Gioanna in d'ona pittura del 1485 circa.

La Gioanna d'Arch (in frances medi: Jehanne Darc; in frances moderno: Jeanne d'Arc; Domrémy, 6 de genar del 1412 - Rouen, 30 de magg del 1431), conossuda anca cont el soranomm de Tosetta de Orléans, l'è stada ona pastora e ona guerriera francesa.
L'è considerada l'eroina nazzionala de la Francia, e l'è venerada 'me santa de la Gesa Catolega (l'è patrona del sò Paes).
Nassuda e cressuda in de la Lorena, l'ha sentuu el dover de liberà el sò Paes, che l'era dree a perd la Guerra di Cent Agn contra i Ingles. L'ha convinciuu l'erede al trono Carlo de Valois a daggh el comand di armad frances, e j'ha menaa a la riscossa, per esempi cont el liberà la città de Orléans. Dopo duu agn de battaj vittorios (1428-1430), l'è stada brancada di Borgognon, che l'hann venduda ai ingles. Quei là l'hann processada per eresia e l'hann brusada viva.
In del 1456 el papa Callist III l'ha revisionaa el process e l'ha ditt che 'l vareva minga. L'è stada beatificada in del 1909 del Pio X, e canonizada in del 1920 de Benedett XV.